Mu rukerera rwo kuri uyu wa Gatatu ni bwo ikipe y'igihugu ya Argentine yacakiranaga na Canada mu mukino wa 1/2 cya Copa America ya 2024 irimo irabera muri Leta Zunze Ubumwe za Amerika.
Ni umukino warangiye ikipe y'igihugu ya Argentine itsinze ibitego 2-0 bya Julian Alvarez ku munota wa 22 ku mupira yahawe na Rodrigo De Paul ndetse na Lionel Messi ku munota wa 51 ku mupira yahawe na Enzo Fernandes.
Uyu mukino wasize Drake ahombye arenga Miliyoni 390 z'amafaranga y'u Rwanda dore ko yari yayategeye ikipe y'igihugu cye cya Canada ko ari yo iri butsinde uyu mukino.
Iyo biramuka bikunze ibyo yari yateze, yari gutsindira Miliyari 3 z'amafaranga y'u Rwanda zirenga dore ko gutsinda kwa Canada byari bikubiye 9.60 muri Kompanyi ya 'betting' yari yategeyemo.
Ntabwo ari ubwa mbere Drake ateze ariko ntabwo bikunze kumuhira kuko birangira ahombye. Ubuheruka yari yateze ko Tyson Fury ari butsinde mu mukino w'iteramakofi yari yahuriyemo na Oleksandr Usyk ariko birangira bidakunze ahomba arenga ibihumbi 565 by'amadorari y'Amerika yari yateze.
Mu mupira w'amaguru ho yigeze kuribwa ku mukino wa nyuma w'igikombe cy'Isi cya 2022 aho yari yavuze ko Argentine iri butsinde u Bufaransa, gusa iminota isanzwe y'umukino irangira amakipe yombi anganya.
Drake yahombye arenga Miliyoni 390 z'amafaranga y'u Rwanda
Drake yari yateze ko ikipe y'igihugu ya Canada ariyo itsinda umukino