Iki gitabo azakimurika abifashijwemo na Vital Readings Publishers, ikigo gishya cy'urubyiruko, cyihaye intego yo guteza imbere umuco wo kwandika no gusoma.
Dr. Norman Paul Desire agiye kumurika iki gitabo mu gihe yizihiza isabukuru y’imyaka 60 y'amavuko, ndetse n’imyaka irenga 40 amaze akorera Imana mu murimo w’ivugabutumwa. Ni urugendo rurerure rwuzuye ubwitange, guhamagarwa n’Imana no gukomeza gukorera mu ntege nke, ariko ahabwa imbaraga n’Uwamuhamagaye.
Igitabo “Staying the Course” kigaruka ku buzima bwa Dr. Norman kuva akiri umwana mu nkambi z’impunzi za Gahunge na Nshungerezi, kugeza ku guhamagarwa gukomeye kwahinduye icyerekezo cy’ubuzima bwe. Igitabo gikomeza kigaragaza uko yasubiye mu gihugu cye cy'u Rwanda, akahafungurira umuryango "Christ for the Nations Ministries (CNM)" — ukomeje guteza imbere imibereho y’abaturage.
Uyu muryango ukora ibikorwa birimo: Guteza imbere iterambere ry’abaturage, amahugurwa y'ubumenyi ngiro, gufasha imiryango itishoboye, guteza imbere ubuyobozi mu bayobozi b'amatorero, kurera no gutuza impfubyi n'abapfakazi.
Mu 2014, CNM yashinze kandi ishuri Blessing School riherereye i Cyabatanzi mu Karere ka Gasabo, rigamije guhugura abana mu burezi bufite indangagaciro.
Iki gitabo cya Dr. Norman Paul Desire giteye amatsiko mu buryo cyanditswemo, kigafatanya ubuhamya n’amateka maremare y’umurimo w’Imana. Kigaragaza inshingano z’ubuzima, guhamagarwa kw’Imana, n’imbogamizi ziboneka mu rugendo rwo kuyikorera.
Dr. Norman aha umwanya ukomeye uburyo Imana yambika imbaraga abahamagawe, bityo abasomyi bakabona ishusho y’uko na bo bashobora gukomeza urugendo rw’ukwizera badacika intege.
Umuyobozi wa Vital Readings Publishers yatangaje ko iki gitabo gisohotse mu gihe Isi ikeneye inkuru zubaka icyizere, zigaragaza ko hari abantu b’inyangamugayo bakomeje guhatanira umurongo w’umuhamagaro wabo. Yagize ati, “Ubuzima bwa Dr. Norman ni icyitegererezo cy’ubutwari, ukwihangana no kudacogora mu gukorera Imana.”
Vital Readings Publishers ni urubyiruko rwiyemeje gushyigikira abanditsi no guha ijambo inkuru zifite agaciro binyuze mu bitabo, ibiganiro na 'podcasts'. Bashishikariza abantu gusoma no kwagura imitekerereze.
Igitabo “Staying the Course” kizashyirwa ahagaragara ku wa 14 Ukuboza 2025, kiboneke ku rubuga rwa Vital Readings Publishers ndetse no mu maguriro y’ibitabo yose yo mu mujyi wa Kigali.
Ev. Dr. Norman Paul Desire agiye kumurika igitabo “STAYING THE COURSE: The Story of an African Evangelist, Called, Challenged and Empowered”
Yanyujije mu gitabo inkuru y'ubuzima bwe mu myaka 60 amaze ku Isi ndetse n'imyaka 40 amaze mu murimo w'Imana
Dr. Norman Paul Desire ni we washinze umuryango "Christ for the Nations Ministries (CNM)"
Iki gitabo cya Dr. Norman kizamurikwa ku mugaragaro ku Cyumweru tariki ya 14 Ukuboza 2025