Uru rubanza rwa Rwamucyo wari umuganga mu gihe cya Jenoside yakorewe Abatutsi mu 1994, rukurikiwe n'abatari bake kuko rushobora gutuma igihano yari yarakatiwe cyemezwa cyangwa kikazamurwa kikagera ku gifungo cya burundu.
Rwamucyo w'imyaka 67 y'amavuko yagejejwe imbere y'urukiko agamije kujuririra icyemezo cyafashwe mu 2024 cyamuhamije ibyaha byo kugira uruhare muri Jenoside yakorewe Abatutsi mu 1994, ibyaha byibasiye inyokomuntu ndetse n'uruhare mu mugambi wo gutegura no gushyira mu bikorwa ibyo byaha.
Mu rubanza rwa mbere, abacamanza basanze Rwamucyo yarafashije ubutegetsi bwari buyobowe n'abahezanguni b'Abahutu mu bikorwa byagize uruhare muri Jenoside yakorewe Abatutsi mu 1994 yahitanye abasaga miliyoni y'Abatutsi. Icyo gihe yakatiwe imyaka 27 y'igifungo.
Ubushinjacyaha buvuga ko Rwamucyo atagarukiye ku gushyigikira ubutegetsi bwariho gusa, ahubwo ko yanagize uruhare mu bikorwa byo gukangurira Abahutu kwica Abatutsi. Mu byo ashinjwa harimo ijambo bivugwa ko yavugiye muri Kaminuza ya Butare (UR-Huye) muri Gicurasi 1994, ryashishikarizaga ibikorwa bya Jenoside.
Nanone aregwa kugira uruhare mu gutegura no koroshya ibikorwa byo gushyingura mu byobo rusange imibiri y'ibihumbi by'abishwe muri Jenoside yakorewe Abatutsi mu 1994, ndetse no mu bikorwa byibasiye bamwe mu barokotse bari bakomeretse.
Nubwo urukiko rwa mbere rwavuze ko nta gushidikanya rwagize ku ruhare rwe muri ibyo byaha, Rwamucyo akomeje kubyamagana yivuye inyuma.
Muri uru rubanza rw'ubujurire, yitabaje itsinda rishya rigizwe n'abavoka barindwi bafite inshingano zo guhangana n'ibimenyetso byakoreshejwe mu rubanza rwa mbere no kugaragaza ko imyanzuro yafashwe itari ishingiye ku bimenyetso bihamye nk'uko babivuga.
Uru rubanza ruzamara igihe kirenga ukwezi, rukazarangira ku wa 17 Nyakanga 2026. Rwitabiriwe kandi n'abaregera indishyi bagera kuri 530, barimo abarokotse Jenoside yakorewe Abatutsi mu 1994, ibintu bigaragaza uburemere n'agaciro bifitiye abifuza ko ubutabera bukomeza gukurikirana abakekwaho uruhare muri Jenoside yakorewe Abatutsi.
Ku Bufaransa, uru rubanza ruri mu ruhererekane rw'izindi manza zakurikiranywe hashingiwe ku ihame ry'ububasha mpuzamahanga bwo kuburanisha abantu bakekwaho ibyaha bikomeye byibasiye inyokomuntu, kabone n'iyo byaba byarakorewe hanze y'imbibi z'icyo gihugu.
Mu gihe Rwamucyo akomeje kuvuga ko arengana, ubushinjacyaha bwo busanga imyanzuro y'urukiko rwa mbere yari ikwiye kandi ishingiye ku bimenyetso bihagije. Ni yo mpamvu uru rubanza rwitezweho kongera gusubiza amaso inyuma ku mateka ya Jenoside yakorewe Abatutsi mu 1994 no gusuzuma niba ubutabera bwarakoze uko bikwiye cyangwa niba hari ibikwiye kongera gusuzumwa.
Icyemezo kizafatwa muri uru rubanza gitegerejwe n'abarokotse Jenoside yakorewe Abatutsi mu 1994, imiryango iharanira uburenganzira bwa muntu ndetse n'abakurikirana amateka ya Jenoside yakorewe Abatutsi mu 1994, kuko kizaba gifite uruhare rukomeye mu rugendo rwo gukomeza guhangana n'umuco wo kudahana ku byaha ndengakamere.