Amakuru mashya yatangajwe n'Urwego rwa Canada rushinzwe abinjira n'abasohoka (IRCC), yerekana ko abaturage b'ibihugu byinshi byo muri Afurika bari mu bagizweho ingaruka cyane no kwimwa Visa z'abasura mbere y'iri rushanwa.
Ubusesenguzi bwakozwe hashingiwe ku makuru bwibanze ku bihugu bya Afurika byari bifite nibura ubusabe 100 bwa Visa bwatunganijwe hagati ya tariki ya 14 Ugushyingo 2025 na 31 Werurwe 2026, kugira ngo haboneke ishusho nyayo y'uko ibihugu byitwaye.
Ubwo busesenguzi bugaragaza ko igipimo cy'abimwe visa cyari hagati ya 59.1% na 96.1%, bigaragaza imbogamizi zikomeye abafana benshi bo muri Afurika bahuye na zo mu gushaka kujya kureba irushanwa rikomeye kurusha andi muri ruhago.
Aya makuru areba ubusabe bwa visa y'igihe gito yo kwinjira mu gihugu(TRV) n' uruhushya rw'urugendo rutangwa hifashishijwe ikoranabuhanga (eTA) bwari bwaragaragajwe nk'ubw'abashakaga kujya mu Gikombe cy'Isi.
IRCC ivuga ko muri icyo gihe yatunganyije hafi ubusabe 17,000 bwaturutse mu bihugu n'uturere birenga 160, ariko abahawe uburenganzira bwo kwinjira muri Canada bangana na 41% gusa.
Itandukaniro ryagaragaye hagati y'ibihugu rishingiye ahanini ku buryo Canada yakira abagenzi. Abaturuka mu bihugu bidasabwa visa babanza gusaba eTA, mu gihe abaturage b'ibihugu byinshi bya Afurika basabwa visa y’igihe gito, isaba inyandiko nyinshi no gusuzumwa mu buryo burambuye.
Repubulika Iharanira Demokarasi ya Congo (DRC) ni yo yaje ku mwanya wa mbere mu kugira umubare munini w'abimwe visa, aho 96.1% by'ubusabe bwayo bwanzwe.
Kenya yakurikiyeho n'igipimo cya 91.1%, mu gihe Ghana, ari na yo yari ifite ubusabe bwinshi kurusha ibindi bihugu bya Afurika, hafi abantu icyenda muri 10 basabye visa bayimwe.
Nk’uko tubikesha Business Insider Africa, ibi ni bihugu 9 bya Afurika bigize umubare munini w'abimwe Visa ya Canada
|
Umwanya |
Igihugu |
Abemerewe |
Abimwe |
Ubusabe bwasabwe |
Igipimo cy'abimwe |
|
1 |
DRC |
15 |
370 |
385 |
96.1% |
|
2 |
Kenya |
20 |
205 |
225 |
91.1% |
|
3 |
Ghana |
185 |
1,540 |
1,725 |
89.3% |
|
4 |
Cameroun |
15 |
100 |
115 |
87.0% |
|
5 |
Nigeria |
110 |
675 |
785 |
86.0% |
|
6 |
Senegal |
25 |
145 |
170 |
85.3% |
|
7 |
Ethiopia |
30 |
110 |
140 |
78.6% |
|
8 |
Algeria |
65 |
180 |
245 |
73.5% |
|
9 |
Misiri |
225 |
325 |
550 |
59.1% |
Aya makuru asohotse mu gihe Igikombe cy'Isi cya 2026 kiri kubera muri Canada, Leta Zunze Ubumwe za Amerika na Mexique, imikino igeze muri 1/16, naho ibihugu byo muri Amerika y'Amajyaruguru byakajije ingamba zijyanye n'abinjira n'abasohoka.
Nubwo IRCC itatangaje impamvu zatumye buri busabe bwangwa, ubusanzwe ubusabe bwa visa busuzumwa hashingiwe ku mpamvu z'urugendo, ubushobozi bw'amafaranga, amateka y'ingendo zakozwe mbere, ndetse n'ibimenyetso bigaragaza ko usaba azasubira mu gihugu cye igihe visa izaba irangiye.
Icyakora, ubu busesenguzi bugaragaza ko ingorane zo kubona visa zigikomeje kubera inzitizi zikomeye abaturage b'ibihugu byinshi bya Afurika, ndetse no mu gihe habaye ibirori bikomeye ku rwego rw'Isi nk'Igikombe cy'Isi.