Iyi mirongo yikora kubera ko uruhu ruba rwakwedutse rukiyongera ariko noneho poroteyine ziba mu nyama z’umubiri zizwi ku zina rya “COLLAGENE” na “ELASTINE” zo ntizibashe kwiyongera bityo zakwikwega zikagenda zisigamo imyanya hagati yazo. Amaribori akunze kugaragara ku mabuno, ku nda, mu rukenyerero, ku matako, ku mabere, mu kwaha,...
N’ubwo bijya bigorana mu kwirukana burundu aya maribori, dore bimwe mu bikoze imiti irinda cyangwa yirukana amaribori:
1. Igikakarubamba(aloe vera):
Iki kimera ni kimwe mu byifashishwa mu guhangana na zimwe mu ndwara z’uruhu. Umushongi w’igikakarubamba ukungahayemo vitamine zitandukanye, imyunyungugu ndetse na za poroteyine nyinshi bigaburira uruhu mu buryo butandukanye. Fata ibibabi by’igikakarubamba ubishishure kugirango ugere ku gice kirimo umushongi. Siga umushongi w’igikakarubamba ahantu hari amaribori ubundi urindire amasaha 2 ubone kuhunyuguza n’amazi y’akazuyaze.
2.Umutobe w’indimu:
Indimu zikungahaye mo vitamine C ifasha umubiri mu gukora za poroteyine nyinshi zizwi ku izina rya “COLLAGENE” na “ELASTINE”. Umubiri ufite izi poroteyine zihagije ntugaragaraho amaribori. Siga ahantu hari amaribori uyu mutobe w’indimu ubundi urindire wumireho ubone kuhunyuguza n’amazi y’akazuyaze.
3.Umutobe w’ibirayi:
Uyu ni umuti udahenze kandi uboneye ku maribori, uyu umutobe ukungahayemo intungamubiri zituma habaho gukura k’uturemangingo tw’uruhu ndetse hakabaho no gusimbuza udushaje. Satura ikirayi mo ibisate ubundi ugende ubikuba ahari amaribori ubundi ureke hume ubone kuhunyuguza n’amazi y’akazuyaze kandi ibi ubyubahirize buri munsi.
4.Amavuta ya olive:
Aya nayo ni amwe mu yakungahayemo intungamubiri zishobora gusana uruhu rwangiritse. Siga ahantu hari amaribori usa n’uhakuba buhoro buhoro ukoresheje aya mavuta nyuma urindire iminota 30 kugirango uruhu runyunyuze intungamubiri ziri muri aya mavuta ubone kunyuguza.
5.Isukari, amavuta ya amande n’indumu:
Fata ikiyiko cy’isukari ukivange na mililitiro 50 z’amavuta y’amande ujojoberezemo indimu ubundi ukube ahari amaribori mu gihe cy’iminota 10, ubikore buri munsi mu gihe cy’amezi abiri bizatanga impinduka.
6. Umweru w’igi:
Umweru w’igi ukungahayemo poroteyine nyinshi, wusige ahari amaribori uwurekereho mu gihe cy’iminota 15 ubone kuhunyuguza.
7.Amazi:
Iyi miti yo haruguru ntacyo izamara igihe umubiri udafite amazi ahagije, umuntu urwaye amaribori agomba kunywa amazi ahagije kandi akisiga amavuta akurura amazi mu nyama z’umubiri (lait corporel hydratante=moisturizing lotion).
8.Imirire:
Mu gihe umubiri utabona intungamubiri zihagije, ntabwo wakwisiga amavuta yonyine ngo uruhu rugire itoto.
Uburyo bwo kwa muganga:
-Ubuvuzi bukoresheje amavuta arimo ibyo bita retinoid(bifite aho bihurira na vitamine A)
-Ubuvuzi bukoresheje “laser”(ubuvuzi bukoreshejwe imirasire)
-Kubaga(surgery)
Mu muco wacu no mu bihangano byacu usanga ahanini dukomoza ku maribori nk’ikimenyetso cy’ubwiza ariko siko biri. Amaribori akenshi agaragara nta kibazo ateje ariko rero nanone hari igihe aza mu buryo bukabije, umuntu akocyerwa, akishimagura rimwe na rimwe akanabyimbirwa cyane. Nta buryo buriho bwo kuyakumira 100% ariko gukora siporo ndetse no kurya neza biri mu byakwitabazwa mu buryo bwo kuyirinda, kwisiga amavuta cyangwa kurya indyo ikungahaye muri bimwe mubyo twavuze haruguru nabyo biri mu bituma agenda agabanuka. Ikindi umuntu ashobora kuvanga ubu buryo kugirango umusaruro ugaragare mu gihe cya vuba. Dusangize igitekerezo cyawe haba hano cyangwa kuri e-mail: baumarco81@gmail.com
Mwabikusanyirijwe na Phn Marcelo Baudouin