Doja Cat uherutse i Kigali agiye guhagarika umuziki

Ku wa 17 Werurwe 2026, uyu mukobwa yataramiye i Kigali mu gitaramo cyasize ibyishimo n’ibiganiro bidashira ku mbuga nkoranyambaga. Bwari ubwa mbere ataramiye muri Afurika, ndetse ibihumbi by’abantu bari bamushyigikiye mu gitaramo yakoreye muri BK Arena.

Uyu muhanzikazi wamamaye mu ndirimbo zirimo Woman, Paint The Town Red na Scarlet, yavuze ko yumva akeneye igihe cyo kuruhuka no kwita ku buzima bwe bwo hanze y’umuziki.

Mu kiganiro yagiranye n’abanyamakuru, yavuze ko nyuma yo kurangiza uru rugendo rw’ibitaramo ashobora kumara imyaka itatu adakora umuziki. Yagize ati: “Ntekereza ko nshaka gufata imyaka itatu y’ikiruhuko.”

Doja Cat yavuze ko muri icyo gihe ashaka kubaho ubuzima busanzwe no gukora ibintu yagiye ashyira ku ruhande kubera akazi ka muzika.

Ati: “Ndashaka gukora ibyo nshaka byose. Wenda nzongera gushushanya ku nkuta.  Ndashaka no gutunganya no gushyira ibikoresho mu gice cyo hejuru cy’inzu yanjye kuko hashize imyaka ine cyangwa itanu nta kintu kirimo.”

Kwamamaza ko ashobora kuba ahagaritse umuziki byakuruye impaka ku mbuga nkoranyambaga, aho bamwe mu bafana be bamushyigikiye bavuga ko kuruhuka bishobora kumufasha kwisubiraho no kongera guhanga ibihangano bishya.

Hari uwagize ati: “Icy’ingenzi ni uko aba yishimye kandi ari cyo ashaka koko." Undi nawe ati: “Nizera ko azagarukana imbaraga zidasanzwe nyuma y’icyo kiruhuko.”

Abandi ariko babifashe nk’urwenya, bamwe bavuga ko yakwifatira igihe kinini kurushaho cyangwa se agahagarika burundu umuziki.

Nubwo yatangaje ibyo bitekerezo, Doja Cat aracyakomeje ibikorwa bye bya muzika ndetse ategerejwe gutaramira i Dublin muri Ireland ku wa 19 Gicurasi 2026, mu gitaramo kiri muri Tour Ma Vie World Tour.

Doja Cat yemeje ko agiye gufata ikiruhuko cy’imyaka itatu mu muziki nyuma y’urugendo rw’ibitaramo “Tour Ma Vie”