Iki gitaramo gitegurwa na Global Citizen, umuryango mpuzamahanga uzwi mu kurwanya ubukene bukabije, mu bufatanye na pgLang, kikaba kigamije guteza imbere ubukungu bushingiye ku muziki muri Afurika.
Move Afrika, imaze imyaka itatu itegura ingendo z’abahanzi bakomeye ku mugabane wa Afurika, igamije gushyiraho uburyo bwihariye bwo gukorera ibitaramo mu bihugu bitandukanye bya Afurika.
Ku wa 17 Werurwe 2026, Kigali izakira igitaramo cya mbere, mbere y’uko urugendo rukomereza mu Mujyi wa Pretoria ku wa 20 Werurwe 2026, muri Afurika y’Epfo, aho Doja Cat azataramira.
Mu itangazo rigenewe abanyamakuru, Doja Cat yavuze ko “Guhera ku mizi yanjye ya Afurika y’Epfo kugera ku rwego rw’isi, tuzazana imbaraga, intego, n’impinduka nyazo muri Move Afrika i Kigali na Pretoria. Si urugendo gusa, ni urugamba rwo guhanga akazi n’amahirwe azamara igihe kirekire.”
Yakomeje avuga ko iyi gahunda igaragaza ko “Afurika itasigaye inyuma, ahubwo iriho kandi yiteguye guhanga udushya ku isi yose.”
Move Afrika 2026 izakomeza kongera amahirwe y’akazi mu Rwanda, aho abakozi barimo abahanzi, abakozi b’ibitaramo, n’abashoramari b’imbere mu gihugu bazahurizwa hamwe.
Mu myaka yashize, Move Afrika yaragize uruhare mu gutanga akazi ku bantu barenga 2,500 i Kigali na Lagos, aho abakozi b’imbere mu gihugu barimo 90% by’abakora ibikorwa byose bya tekiniki n’icapiro ry’amajwi n’urumuri.
Jean-Guy Afrika, Umuyobozi Mukuru wa RDB, yashimiye Move Afrika kugaruka mu Rwanda.
Ati “Iki gikorwa gifasha mu guteza imbere urwego rw’imyidagaduro mu gihugu no gutanga amahirwe y’akazi ku rubyiruko, ndetse kikanatanga inyungu z’igihe kirekire ku gihugu n’umugabane wose.”
Move Afrika 2026 izibanda kandi ku guteza imbere ubuvuzi n’imiyoborere y’ubuzima muri Afurika.
Mu gihe cyo gutegura ibitaramo, hazashyirwaho ibikorwa bigamije gushishikariza abategetsi gushora imari mu buvuzi bw’ibanze, uburenganzira ku buzima bw’imyororokere, no kugabanya imbogamizi z’amafaranga ku buzima rusange.
Move Afrika igamije guha amahirwe abahanzi n’abafatanyabikorwa b’imbere mu gihugu, gushora imari mu bikorera ku giti cyabo, no kuzamura urwego rw’umuziki w’Afurika ku rwego rw’isi.
Ibi bitaramo ni igikorwa kinini gihuza impano nyinshi, ibikorwa by’ubukungu, n’imiyoborere myiza y’amasoko y’umuziki, bityo bigatera imbere urwego rw’ubuhanzi ndetse n’ubukungu muri rusange.
Doja Cat azifatanya n’abahanzi batandukanye mu gitaramo cya Move Afrika: Kigali, mbere yo gukomeza urugendo rwe muri Move Afrika: Pretoria muri Afurika y’Epfo ku wa 20 Werurwe 2026.
Iby’ingenzi wamenya kuri Doja Cat
Doja Cat ni umwe mu bahanzi b’abagore bagezweho ku rwego mpuzamahanga, wamamaye kubera guhuza injyana zitandukanye zirimo Pop, Hip-Hop na R&B, akabivanamo umwimerere wamugize icyamamare ku isi.
Yavutse ku wa 21 Ukwakira 1995 i Los Angeles muri Leta Zunze Ubumwe za Amerika, yitwa Amala Ratna Zandile Dlamini. Afite inkomoko muri Afurika y’Epfo ku ruhande rwa se, ari na ho akunze kugaruka mu biganiro bye agaragaza ishema ry’iyo mizi.
Izina “Doja Cat” ryatangiye kumenyekana cyane mu 2018 ubwo yasohoraga indirimbo “Mooo!” yakwirakwiye ku mbuga nkoranyambaga. Nyuma yaho yaje gushyira hanze album Hot Pink (2019) yarimo indirimbo “Say So” yamufashije kugera ku mwanya wa mbere kuri Billboard Hot 100, ndetse aza no kwegukana igihembo cya Grammy Award.
Mu 2021 yasohoye album Planet Her yakunzwe cyane ku isi hose, irimo indirimbo nka “Kiss Me More” yakoranye na SZA. Mu 2023 yasohoye Scarlet, album yagaragaje impinduka mu njyana ye, agaruka cyane ku murongo wa Hip-Hop.
Doja Cat azwi kandi ku mubyinire we, imyambarire idasanzwe, n’uburyo akoresha imbuga nkoranyambaga mu buryo budasanzwe, ibintu byamufashije kubaka igikundiro gikomeye mu rubyiruko.
Uyu muhanzi amaze kwegukana ibihembo bikomeye birimo Grammy Awards, Billboard Music Awards na American Music Awards, ndetse yagiye ataramira mu bitaramo bikomeye ku rwego rw’isi.
Kuri ubu, Doja Cat akomeje urugendo rwo kwagura izina rye ku migabane itandukanye, aho azataramira i Kigali muri Move Afrika 2026, igitaramo kizahuza umuziki n’iterambere ry’ubukungu bw’ubuhanzi muri Afurika.
Doja Cat azataramira i Kigali: Umuziki w’icyamamare ku rwego rw’isi azafatanya n’abahanzi batandukanye mu gitaramo kizabera muri BK Arena ku wa 17 Werurwe 2026
Move Afrika izazamura ubuhanzi mu Rwanda: Ibikorwa byo gutegura iki gitaramo bizahuza abahanzi, abakozi, n’abashoramari b’imbere mu gihugu
Global Citizen izibanda ku buzima n’imiyoborere: Iki gitaramo kizakoresha ubukangurambaga mu guteza imbere ubuvuzi bw’ibanze n’uburenganzira ku buzima bw’imyororokere
