Mu gitondo cyo kuri uyu wa Mbere, tariki ya 10 Kanama 2026, ku cyicaro gikuru cya Polisi y’u Rwanda ku Kacyiru, DIGP DCG Jeanne Chantal Ujeneza yahaye impanuro abapolisi 160 bitegura kujya mu butumwa bw’Umuryango w’Abibumbye muri Sudani y’Epfo, UNMISS.
Aba bapolisi bazakorera mu ntara ya Upper Nile, ahitwa Malakal, aho bagiye mu butumwa bwo kugira uruhare mu bikorwa byo kubungabunga amahoro muri icyo gihugu.
DIGP Ujeneza yabibukije ko kujya mu butumwa mpuzamahanga atari uguhagararira Polisi y’u Rwanda gusa, ahubwo ko ari n’uguhagararira igihugu.
Yabasabye kuzitwara neza, gukora kinyamwuga, kubahiriza ikinyabupfura no gukorana neza hagati yabo ndetse n’abandi bazasanga muri ubwo butumwa.
DIGP Ujeneza yabasabye gukomeza kubahisha izina ryiza u Rwanda rufite mu butumwa bw’amahoro. Ati: “Mugiye mu kazi igihugu kibatumye, mugomba kuzagaragaza ubudasa mu buryo bwa kinyamwuga kuko u Rwanda tuzwiho gukora neza cyane cyane mu butumwa bw’amahoro.”
Yabasabye kandi kubana neza na bagenzi babo, kubaha imico y’abo bazaba bashinzwe kurinda ndetse n’abo bazakorana. Yongeyeho ko ikinyabupfura ari ingenzi mu kubafasha gusohoza neza inshingano igihugu kizaba cyarabatumye.
Ati: “Muzabane neza na bagenzi banyu kandi mwubahe imico y’abo mugiye kurinda n’abo muzakorana, muzagaragaze ikinyabupfura kuko aricyo kizabafasha gusohoza akazi mwatumwe neza.”
Aba bapolisi bazakorera ahantu hatandukanye n’u Rwanda mu bijyanye n’imiterere y’aho, ariko DIGP Ujeneza yababwiye ko ibyo bitagomba kubabuza gukora inshingano zabo uko bikwiye.
Yabibukije ko hari abandi bapolisi b’u Rwanda bababanjirije muri ubwo butumwa, bagakora inshingano zabo neza. Yagize ati: “Aho muzaba mukorera hose mu mirimo itandukanye mugomba kugaragaza ko igihe cyose muhora mwiteguye kandi mushoboye kuko mwabyize neza.”
Yabasabye kandi kuzahagararira u Rwanda nk’aba ambasaderi beza, haba mu mico no mu myifatire. Ati: “Muzahagararire u Rwanda nka ba ambasaderi beza mu mico no mu myifatire nka zimwe mu ndangagaciro ziranga Abanyarwanda.”
Iri tsinda ry’abapolisi 160 rizwi nka RWAFPU1-11, rikaba riyobowe na Senior Superintendent of Police (SSP) Steven Muhizi.
Rigiye gusimbura irindi tsinda ry’abapolisi b’u Rwanda ryari rimaze umwaka muri Sudani y’Epfo, mu butumwa bw’Umuryango w’Abibumbye bwo kubungabunga amahoro.
Abapolisi b’u Rwanda bamaze imyaka bakora mu butumwa bw’amahoro mu bihugu bitandukanye ku isi, aho u Rwanda rukomeje kugira uruhare mu bikorwa mpuzamahanga bigamije kurinda abaturage no guteza imbere amahoro.
Ku bapolisi 160 bagiye muri Sudani y’Epfo, ubutumwa bwa DIGP Ujeneza bwibanze ku ngingo eshatu z’ingenzi: gukora kinyamwuga, kurangwa n’ikinyabupfura no guhagararira u Rwanda neza.
