Diddy, ufite imyaka 56, afungiye muri FCI Fort Dix muri New Jersey, aho arimo kurangiza igihano cy’amezi 50 yakatiwe nyuma yo guhamwa n’icyaha cyo gutwara abantu agamije ko bakora ubusambanyi.
Raporo ya NBC yatangaje ko Diddy yaba yarahabwaga uburyo bwihariye muri gereza, burimo gutekerwa amafunguro adasanzwe, gukorerwa massage ndetse no guhemba abandi bafungwa kugira ngo bamukorere imirimo.
Nyuma y’iyi raporo, Diddy yashyizwe muri Special Housing Unit (SHU), igice cyihariye cya gereza gishyirwamo imfungwa mu gihe hari iperereza ririmo gukorwa.
Abantu bane bavugaga ko bafunganywe na Diddy mu gice kimwe cya gereza babwiye NBC ko uyu muhanzi yabagaho mu buryo budasanzwe ugereranyije n’abandi bafunganywe.
Umwe muri bo, wavuze ko yajyaga atekerera Diddy, yasobanuye ko amafunguro ye yarimo pizza, inkoko itetse mu buryo bwa curry ndetse na empanadas. Yavuze ko nyuma y’igihe yaje kurambirwa no kumutekera.
NBC kandi yatangaje ko yabonye ifoto bivugwa ko igaragaza Diddy akoresha telefoni itemewe muri gereza. Umwe mu bari bafunganywe na we yavuze ko uyu muhanzi yajyaga akoresha Instagram ndetse akakira amafoto y’urukozasoni yoherezwaga n’uwahoze ari umukunzi we.
Hari n’andi makuru yavugaga ko Diddy yari afite inzoga zihenze zazanywe mu buryo butemewe muri gereza, ndetse ko yari afite imiti igabanya kwiheba.
Icyakora, umuvugizi wa Diddy yahakanye ko ubuzima bwe muri gereza bwaba burimo ibintu bidasanzwe. Yavuze ko gukomeza gukurikiranwa kwa buri kantu kose ku buzima bwa Diddy muri gereza byageze aho ibitangazamakuru bifata ibintu bisanzwe nk’inkuru ikomeye.
Uyu muvugizi yavuze kandi ko Diddy akomeje kurangiza igihano cye yubahiriza amabwiriza ya gereza, mu gihe ategereje icyemezo cy’urukiko ku bujurire bwe.
Ku ruhande rw’Ikigo gishinzwe amagereza muri Leta Zunze Ubumwe za Amerika (Bureau of Prisons), umuvugizi wacyo yavuze ko badatanga amakuru arambuye ku buzima bw’imfungwa kubera impamvu zirebana n’ibanga, umutekano n’umutekano w’ibigo bifungirwamo.
Yongeyeho ko ibikoresho bitemewe, cyane cyane telefoni, ibiyobyabwenge n’intwaro, bikomeje kuba ikibazo mu magereza, ariko ko hakomeje gufatwa ingamba zo kubikumira.
Diddy yari yaravuye mu gice cyihariye cya gereza muri Kanama 2026, nyuma yo gushyirwamo kubera imirwano yagiranye n’undi bafuganywe mu kwezi kwa Nyakanga.
Mu Ukwakira 2025, yakatiwe igifungo cy’amezi 50 nyuma yo guhamwa n’icyaha cyo gutwara abantu agamije ko bakora ubusambanyi.
Biteganyijwe ko Diddy azasoza igihano cye ndetse akarekurwa ku wa 21 Mutarama 2028.
Diddy yongeye gushyirwa mu gice cyihariye cya gereza nyuma y’amakuru yagiye hanze