Declan Rice wa Arsenal yasabye bagenzi be kwirinda urusaku rwo hanze

Kuri uyu wa Kane ni bwo Arsenal yari yakiriwe na Bretford mu mukino wo ku munsi wa 26 wa shampiyona y’icyiciro cya mbere mu Bwongereza.

Iyi kipe itozwa na Arteta yasabwaga gutsinda kugira ngo igumishemo ikinyuranyo cy’amanota yarimo hagati yayo na Manchester City ya kabiri ku rutonde rwa shampiyona ariko birangira byanze inganya 1-1. Ni igitego cya Noni Madueke ku munota wa 61  ubundi Keane Lewis-Potter yishyura ku munota wa 71.

Nyuma y’uyu mukino, Declan Rice yavuze ko badashobora kugenda mu murongo umwe kuva ku munsi wa mbere kugeza ku wa nyuma. Yagize ati: “Muri uru rugendo ntushobora guhora uri ku rwego rwo hejuru buri mukino wose. Hari igihe uzamuka n’igihe umanuka. Icy’ingenzi ni ukwibanda ku tuntu duto no gukora iby’ibanze neza.”

Yakomeje ashimangira ko gukina na Brentford bitari byoroshye, kuko iri mu makipe akomeje kwitwara neza muri shampiyona.“Ntabwo ndi umunyabwenge buke ngo ntekereze ko Brentford ari ikipe yoroshye. Ni imwe mu makipe meza muri iyi minsi. Twabonye inota rimwe, nubwo twifuzaga amanota atatu.”

Yavuze ko bari gukina n’amakipe akomeye. Ati: ”Turimo gukina n’amakipe akomeye kurusha ayandi, buri cyumweru, buri mukino. Tugomba gukomeza gushyiramo imbaraga no kwiyizera, tugakora kandi tugenzura ibyo dushoboye kugenzura”.

Declan Rice yavuze ko “Tugomba kwirinda urusaku rwo hanze. Ibyo twabikoze neza cyane kugeza ubu. Abantu bazavuga byinshi ku rugamba rw’igikombe no kuri Arsenal, ariko twe dufite itsinda rituje kandi rifite ituze mu mutima.”

Arsenal irimo gushaka kwegukana igikombe cya shampiyona ku nshuro ya mbere kuva mu 2004, nyuma yo kurangiza ku mwanya wa kabiri inshuro eshatu zikurikiranya.

Kugeza ubu irarusha amanota ane Manchester City ya kabiri mu gihe habura imikino 12 ngo shampiyona irangire.

Declan Rice yasabye bagenzi be kwirinda urusaku rwo hanze

Declan Rice avuga ko ibintu byose babifite mu biganza