Miss Keza Elinah yitabye Imana mu ijoro ryo kuwa kabiri rishyira kuwa gatatu tariki ya 31/7/2013. Umuvandimwe wa nyakwigendera yavuze ko umugabo wa Elinah yatashye nijoro bagirana utubazo twabaviriyemo kurwana, hanyuma umugabo yanize uyu mugore arangije amutera icyuma arapfa.
Miss Linah Keza wabaye Miss Africa mu mwaka wa 2009 yishwe tariki 31 Nyakanga 2013
Nk’uko byatangajwe icyo gihe n’urubuga rwa investigator.co.ug rwo muri Uganda, rwavuze ko uyu mugabo David Kikaawa yishe uyu mugore we amuziza ko yamuciye inyuma. Amaze kumwivugana yahise acika ariko akora ibishoboka byose arabanza akwirakwiza igihuha cy’uko yahise ajya kwiyahura ndetse ngo umurambo we bakaba bawusanze, mu majyaruguru y’umujyi wa Londres ariko nyuma aza gutahurwa.
Mbere y'uko aya mahano aba, David na Keza bajyaga bafatanya mu bikorwa bitandukanye
Nyuma y’uko atawe muri yombi, David Kikaawa yagejejwe imbere y’ubutabera kuri uyu wa kabiri tariki 22 Mata 2014 mu gihugu cy’u Bwongereza, aho yaregwaga ibyaha bitandukanye birimo kwica uwo bashakanye ndetse no gukwirakwiza ibihuha by’uko yihahuye, ibyo byaha byose ariko akaba yarabihakanye burundu aratsemba, urubanza ruza gusubikwa rukaba ruzasubukurwa kuwa kane w’iki icyumweru.
Miss Linah Keza bivugwa ko uyu mugabo we yaba yaramuzizaga ko yamukekagaho kumuca inyuma
Uyu mugabo David Kikaawa ukurikiranweho urupfu rw’umunyarwandakazi Keza Elinah wabaye Miss Africa, bari barabyaranye umwana umwe w’umukobwa witwa Holy, icyo gihe akaba yarabuze mama we afite imyaka 3 gusa ahita ajya kubana na nyirarume ari we musaza wa mama we nawe wabaga mu Bwongereza, uyu mwana ufite imyaka 4 kugeza ubu akaba ari naho akibera.
Uyu mwana witwa Holy niwe Miss Linah yari yarabyaranye na David
Manirakiza Théogène