Ku wa Mbere tariki ya 14 Nzeri 2026, Dangote yatangije IPO y’uruganda rwe rwa peteroli ku Isoko ry’Imari rya Nigeria (NGX), mu gikorwa Reuters yavuze ko ari IPO nini kurusha izindi zabayeho muri Afurika.
Uru ruganda rufite agaciro kagereranywa hafi ya miliyari 49 z’amadolari, aho imigabane mishya igera kuri miliyari 4.1 ni yo yashyizwe ku isoko.
Forbes igaragaza ko umutungo wa Dangote wazamutse uva kuri miliyari $28.5 ukagera kuri $51.3, bituma yinjira mu bantu 40 bafite umutungo uhambaye ku Isi, aho ari ku mwanya wa 36 kuri uru rutonde avuye kuwa 76.
Icyakora, imibare ya Bloomberg yo iracyerekana ko umutungo we uri hafi ya miliyari $35.3, bivuze ko ibigo bibiri by’imari bitanga imibare itandukanye bitewe n’uburyo bibara agaciro k’imigabane n’imitungo y’abaherwe.
Izamuka ry’agaciro k’umutungo wa Dangote rije mu gihe uruganda rwe rwatangiye gutanga imigabane ku baturage n’abandi bashoramari, bigatuma agaciro k’uruganda kabarwa ku rwego rwo hejuru ku isoko ry’imari.
IPO ya Dangote Refinery igizwe n’imigabane mishya miliyari 4.1, buri mugabane ugurishwa ku mafaranga 525 y’ana-Naira.
Umuntu ashobora gutangira asaba imigabane nibura 10. Iyi migabane yose nigurwa, iki gikorwa gishobora kuzinjiriza uruganda hafi triliyoni 2.15 z’ama-Naira, ni ukuvuga hafi miliyari $1.6.
Igikorwa cyo kugurisha iyi migabane cyatangiye ku wa 14 Nzeri 2026, kikazageza ku wa 13 Ukwakira 2026.
Dangote ubwe ni we watangije ku mugaragaro iki gikorwa ku nyubako y’Isoko ry’Imari rya Nigeria i Lagos.
Iki gikorwa cyiswe “People’s IPO”, kuko Dangote ashaka ko abaturage basanzwe babona amahirwe yo kugira uruhare mu mutungo w’uruganda rwe.
Dangote yavuze ko intego nyamukuru atari ugushaka amafaranga gusa, ahubwo ari ugufungurira abantu benshi amahirwe yo kugira uruhare mu iterambere ry’uruganda rwe.
Uru ruganda rufite ubushobozi bwo gutunganya utugunguru hafi 700,000 ya peteroli ku munsi, kandi gahunda ihari ni ukurwongerera ubushobozi rukagera kuri miliyoni 1.4 z’utugunguru ku munsi mu myaka iri imbere. Amafaranga azava muri IPO azafasha mu kwagura ibikorwa by’uruganda.
Dangote Refinery yatangiye gukora mu 2024 nyuma y’imyaka irenga icumi yamaze yubakwa, ku gishoro cyagereranyijwe hafi ya miliyari 20 z’amadolari.
Ubu ni rumwe mu nganda nini cyane zitunganya peteroli ku Isi, ndetse ibikorwa byarwo byagize uruhare mu gufasha Nigeria kugabanya icyuho cyatezwaga no gutumiza ibikomoka kuri peteroli hanze y’igihugu.
IPO yayo kandi yahaye abaturage ba Nigeria n’abandi bashoramari amahirwe yo kuba abafatanyabikorwa b’uruganda rwari rusanzwe rufitwe ahanini n’umuryango wa Dangote.