Nk’uko byatangajwe na ambasade ya Cuba muri Leta Zunze Ubumwe za Amerika, abazarekurwa barimo abanyamahanga, urubyiruko, abagore ndetse n’abafite imyaka irenga 60.
Iyo ambasade yavuze ko iki gikorwa kiri gukorwa “mu rwego rwo kwizihiza iminsi mikuru ya Pasika (Holy Week), bikaba bisanzwe bikorwa muri gahunda y’ubutabera bw’iki gihugu.”
Kuva Perezida wa Amerika, Donald Trump, yagaruka ku buyobozi, yagaragaje ubushake bwo guhindura ubutegetsi bwa Cuba, ndetse ashyiraho ibihano bikomeye birimo no guhagarika iyoherezwa ry’ibikomoka kuri peteroli muri iki gihugu.
Ibi byatumye Cuba ihura n’ikibazo gikomeye cy’ibura ry’amavuta ndetse n’umuriro w’amashanyarazi uhora uzima mu bice byinshi by’igihugu.
Mu cyumweru gishize, ubwato bw’u Burusiya bwari butwaye peteroli ingana na 'barili' 730,000 bwabaye ubwa mbere bugera ku cyambu cya Cuba kuva mu ntangiriro za Mutarama.
Umuryango mpuzamahanga uharanira uburenganzira bwa muntu, Human Rights Watch, uvuga ko Cuba ifite imfungwa za politiki amagana, kandi ko abanenga ubutegetsi bakunze gukorerwa ihohoterwa no gukurikiranwa n’amategeko.
Ambasade ya Cuba yavuze ko abarekurwa batoranyijwe hashingiwe ku isesengura ryimbitse ry’ibyaha bakoze, imyitwarire bagaragaje muri gereza, igihe bamaze bafunzwe ndetse n’ubuzima bwabo.
Si ubwa mbere Cuba ifata iki cyemezo muri uyu mwaka. Muri Werurwe 2026, imfungwa 51 zararekuwe nyuma y’imishyikirano yabayeho na Vatikani. Mu mwaka wa 2025 na bwo, abantu 553 barekuwe mu masezerano yahujwe na Vatikani na Leta Zunze Ubumwe za Amerika.
BBC itangaza ko iki cyemezo kije mu gihe Cuba ikomeje guhangana n’ibibazo bya politiki n’ubukungu, bikomeje gukurikiranwa n’amahanga.