Kuri uyu wa Gatatu saa tatu z'ijoro kuri Allianz Arena mu Budage nibwo ikipe y'igihugu y'u Budage yakinnye na Portugal mu mikino ya 1/2 cya UEFA Nations League. Ni nyuma y'uko u Budage bwari bwarasezereye u Butaliyani muri 1/4 naho Portugal yo ikaba yari yarasezereye Denmark. Uyu mukino watangiye nta mbaraga nyinshi cyane ufite dore ko iminota 45 ya mbere nta n'igitego kigeze kibonekamo.
Mu gice cya kabiri ikipe ya ikipe y'igihugu y'u Budage yari imbere y'abafana bayo yaje ifungura amazamu ku mupira waruzamuwe na Joshua Kimmich ubundi Florian Wirtz ashyiraho umutwe. Nyuma yo gutsindwa Portugal yakoze impinduka mu kibuga aho havuyemo Ruben Neves,Trincao na Joao Neves hajyamo Nelson Semedo,Francisco Conceição na Vitinha.
Izi mpinduka zahise zitanga umusaruro ubundi ku munota wa 63 Francisco Conceição atsinda igitego cyo kwishyura ku ishoti riremereye yari arekuriye kure. Ikipe y'igihugu ya Portugal yakomeje kwatsa umuriro imbere y'izamu ry'u Budage ubundi ku munota wa 68 Cristiano Ronaldo atsinda igitego cyatanze intsinzi ku mupira yarahawe na Nuno Mendes.
Umukino warangiye Portugal itsinze ibitego 2-1 ihita yerekeza ku mukino wa nyuma wa UEFA Nations League. Uyu munsi hari undi mukino wa 1/2 aho ikipe y'igihugu y'u Bufaransa irakina na Espagne saa Tatu z'ijoro kuri MHPA Arena. Irava hano niyo izahura Portugal ku mukino wa nyuma uzakinwa ku Cyumweru, tariki ya 8 Kamena 2025 Saa Tatu z’ijoro.
Portugal yageze ku mukino wa nyuma wa UEFA Nations League
Cristiano Ronaldo yafashije Portugal kwitwara neza
Cristiano yujuje ibitego 937 amaze gutsinda mu buzima bwe bwose