Kuwa Mbere ni bwo Al Nassr yakinnye umukino wayo wa nyuma wa shampiyona ikaba yarawutsinzwemo na Al Fateh ibitego 3-2. Muri ibi bitego bya Al Nassr harimo kimwe cya Cristiano Ronaldo n'ikindi cya Sadio Mane. Al Nassr yahise isoreza ku mwanya wa 3 muri shampiyona naho Ronaldo we aba umukinnyi watsinze ibitego byinshi muri Arabia Saudite muri uyu mwaka w'imikino bigera kuri 25.
Nyuma y'uyu mukino uyu rutahizamu ukomoka muri Portugal ndetse akaba abitse Ballon d'Or 5 yaciye amarenga yo kuba ashobora kuba agiye gutandukana na Al Nassr. Abinyujije ku mbuga nkoranyambaga ze yashyizeho ifoto ye yambaye umwambaro w'iyi kipe ayiherekeresha amagambo agira ati "Iki gice kirarangiye. Inkuru? Iracyandikwa. Ndabashimira bose."
Cristiano Ronaldo yavuye amarenga yo gutandukana na Al Nassr nyuma y'uko amasezerano ye muri iyi kipe arangiye ariko akaba atari yakongera andi.
Ibi bije nyuma y'uko Perezida w'impuzamashyirahamwe y'umupira w'amaguru ku Isi, FIFA, Gianni Infatino aheruka gutangaza ko bishoboka ko uyu mukinnyi yakina igikombe cy'Isi cy'ama-Club kizabera muri Leta Zunze Ubumwe za Amerika mu kwezi gutaha ndetse ahishura ko hari amakipe yaba ari mu biganiro nawe.
Uyu mukinnyi yageze muri Al Nassr mu kwezi kwa Mbere kwa 2023 nyuma y'uko yari amaze gutandukana na Manchester United mu buryo butari bwiza. Kuva yayigeramo yakinnye imikino 111 aho yatsinzemo ibitego 99 gusa nta gikombe gifatika yayihesheje.
Kugeza ubu Cristiano Ronaldo amaze gutsinda ibitego 936 mu buzima gusa yavuze ko yifuza gutsinda ibitego 1000 mbere y'uko areka gukina ruhago.
Amwe mu makipe ari kuvugwa ko ashobora kwerekezamo harimo ayo muri Leta Zunze Ubumwe za Amerika ndetse na Sporting CP y'iwabo muri Portugal yakuriyemo.
Cristiano Ronaldo yaciye amarenga yo gutandukana na Al Nassr yari amazemo imyaka ibiri n'igice