Cricket: U Rwanda rwakoze amateka mu mikino yo gushaka itike y'igikombe cy'Isi

Kuva ku Cyumweru tariki ya 9 Kanama kuzageza ku wa Gatanu tariki ya 15 Kanama 2026b ku kibuga mpuzamahanga cya Cricket kiri i Gahanga no muri IPRC Kigali hari kubera iri rushanwa ryo gushaka itike y’igikombe cy’Isi mu ngimbi zitarengeje imyaka 19.

Ku munsi wa mbere, u Rwanda ruri mu rugo rwatangiye rukina na Mozambique. U Rwanda ni rwo rwatsinze toss, gutombora gutangira ukubita udupira ibizwi nka batting, mu gihe ikipe y'igihugu ya Mozambique yatangiye ijugunya udupira ibizwi nka bowling,

Ikipe y’igihugu y’u Rwanda yasoje igice cya mbere yashyizeho amanota 411 muri over's 50, Mozambique ikaba yari yasohoye abakinnyi 5 b'uRwanda (5 wickets).

Nyuma y’akazi gakomeye izi ngimbi z'u Rwanda zari zimaze gukora, buri munyarwanda wese wakurikiranye uyu mukino yabonaga ko ikipe y'igihugu ya Mozambique itakuraho icyo kinyuranyo, aba ari na ko bigenda. 

U Rwanda rwasoje uyu mukino rutsinze ku kinyuranyo cy'amanota 322. Ni amateka mashya yanditswe kuko ni ubwa mbere hashyizwemo iki kinyuranyo cy’amanota mu mateka ya Cricket mu Rwanda. Muri uyu mukino, Elise Gihozo w'u Rwanda ni we wabaye umukinnyi mwiza.

Mu yindi mikino yabaye, ikipe y'igihugu ya Uganda yatsinze iya Nigeria ku kinyuranyo cy'amanota 5. Ni mu gihe Ghana yatsinze iya Sierra Leone ku kinyuranyo cy'amanota 130.

Kuri uyu wa Mbere imikino irakomeza aho u Rwanda rurakina na Sierra Leone ku kibuga mpuzamahanga cya IPRC Kigali, Nigeria ikine na Ghana naho Uganda ikine na Mozambique i Gahanga.

U Rwanda rwakoze amateka mu mikino yo gushaka itike y'igikombe cy'Isi