Umuyobozi Mukuru wa OMS, Dr. Tedros Adhanom Ghebreyesus, yavuze ko umurwayi wa mbere yamaze kwakirwa muri ubu bushakashatsi bugamije kureba niba iyo miti ishobora kuvura ubu bwoko bwa Ebola, kugeza ubu butarabonerwa umuti cyangwa urukingo byemewe ku rwego mpuzamahanga.
Yagize ati: "Uyu munsi twatangiye igeragezwa ry'imiti ibiri ishobora kuvura Ebola, kandi umurwayi wa mbere yamaze kwinjizwa muri iri geragezwa."
Dr. Tedros yagaragaje ko nubwo hari abarwayi bamwe bakira Ebola ya Bundibugyo, kubura umuti wemewe bituma abantu benshi bakomeza guhitanwa n'iki cyorezo. Yavuze ko mu gihe ubushakashatsi bwatanga umusaruro, iyi miti yazafasha kurokora ubuzima bw'abantu benshi kurushaho.
Ati: "Nubwo kugeza ubu nta muti wemewe wo kuvura ubu bwoko bwa Ebola uraboneka, hari abarwayi bamaze gukira. Ariko iyo tuba dufite umuti wemewe kandi ukora neza, twashobora kurokora ubuzima bw'abantu benshi kurushaho."
Iri geragezwa rishyigikiwe na OMS, rikaba riri gukorwa ku bufatanye n'Ikigo cy'Ubushakashatsi mu Buzima cya Repubulika Iharanira Demokarasi ya Congo, Ikigo cy'Ubushakashatsi ku Ndwara zo mu Bihugu Bishyuha cyo mu Bubiligi (Institute of Tropical Medicine) ndetse na Kaminuza ya Oxford yo mu Bwongereza.
Amakuru ya OMS agaragaza ko kugeza ubu muri DRC hamaze kwemezwa abarwayi barenga 1,400 banduye Ebola, mu gihe abantu 438 bamaze guhitanwa n'iki cyorezo. Ubu bwoko bwa Ebola ya Bundibugyo buzwiho kwandura vuba no kugira umubare munini w'abo buhitana.
Iki cyorezo cyatangiye kwibasira abaturage bo mu gace ka Rusama, mbere yo gukwirakwira mu bindi bice bya DRC ndetse no kugera muri Uganda, bituma OMS igishyira mu rwego rw'ibyorezo byihutirwa byugarije ubuzima rusange ku rwego mpuzamahanga.
Abahanga mu buzima bavuga ko gutangira iri geragezwa ari intambwe ikomeye mu rugamba rwo gushaka umuti wa Ebola ya Bundibugyo, kuko niriramuka rigaragaje ko iyo miti ikora neza, bizatanga icyizere cyo kubona ubuvuzi bwemewe ku nshuro ya mbere kuri ubu bwoko bwa virusi bumaze imyaka buteza impungenge mu karere ka Afurika yo hagati n'iyo Burasirazuba.