Mu gihugu cy'u Bwongereza hakomeje kubera imikino ya Commonwealth yitabirwa n'ibihugu bivuga icyongera, aho u Rwanda narwo ruri mu bihugu byitabiriye ndetse mu mikino itandukanye.
Mu ijoro ryakeye nibwo ikipe y'igihugu y'u Rwanda mu mukino wa Beach Volleyball yakinaga umukino wayo wa kabiri, nyuma y'umukino ubanza wabaye ku wa 6 batsinda Afurika Y'Epfo amaseti 2-0.
Nk’uko Christopher umutoza mukuru wa Ntagengwa Olivier na Gatsinzi Venuste yatangaje ko basabwa gutsinda umukino wa mbere ubundi ibindi bikagenda neza, ntabwo mu ijoro batengushye abanyarwanda bari babategereje kuko nanone baje gutsinda Maldives amaseti 2-1. Iseti ya mbere yarangiye ku manota 21-16, iseti ya kabiri irangira ku manota 14-21 naho iseti ya gatatu u Rwanda ruyitsinda ku manota 16-14.
U Rwanda ruzagaruka mu kibuga kuwa 3 rukina na Australia mu mukino wa nyuma wo mu itsinda B, umukino uzaba ntacyo uvuze usibye guhatanira umwanya wa mbere.
Imikino ya 1/4 izatangira ku wa 5, imikino ya 1/2 ikinwe ku wa 6 naho umukino wa nyuma no gushaka umwanya wa gatatu bikazaba ku 7.
U Rwanda ni ubwa mbere rwitabiriye imikino ya Beach Volleyball mu bagabo bakuru, ikaba inshuro ya kabiri Beach Volleyball ihagarariwe mu bakuru nyuma y'abagore bagiyeyo mu 2018.
Bamwe mu bafana b'abanyarwanda n'inshuti z'u Rwanda ziba mu Bwongereza, bari baje gushyigikira ikipe y'igihugu
Ntagengwa Olivier na Gatsinzi Venuste ubu bari muri 1/4 cya Commonwealth Game 2022 mu mikino ya Beach Volleyball