Amashusho agaragaza amafaranga menshi, amasaha ya zahabu, imodoka n’ubuzima busa n’ubwiza ni bimwe mu bikoresho bikoreshwa kugira ngo urubyiruko rwumve ko kwinjira muri iyo mitwe ari amahirwe yo kubona amafaranga no kubaho neza.
Raporo y’umuryango Vivamos Humanos ivuga ko bamwe mu bayobozi b’iyo mitwe basezeranya urubyiruko umushahara ushobora kugera kuri miliyoni 12 z’amapeso ya Colombia ku kwezi, amafaranga arenze inshuro zirindwi umushahara muto wemewe muri icyo gihugu.
Abanyamakuru bakoze iperereza bifashishije konti mpimbano ya TikTok biyitirira umusore w’imyaka 17. Mu makonti 33 bavuganye na yo, atandatu yabashubije, kandi amwe yemeye kwakira umwana utarageza ku myaka 18 y’amavuko.
Nyamara, amategeko ya Colombia ateganya igifungo kigera ku myaka 23 ku muntu wese winjiza abana mu mitwe yitwaje intwaro.
Umuryango w’Abibumbye (UN) uvuga ko umubare w’abana bari munsi y’imyaka 18 binjijwe muri iyo mitwe wazamutseho 320% hagati ya 2019 na 2024.
Abaharanira uburenganzira bwa muntu bavuga ko TikTok yorohereza cyane iyo mitwe kugera ku rubyiruko rwo hirya no hino mu gihugu, bitabaye ngombwa ko igera aho batuye.
Hari n’imiryango ivuga ko bamwe mu bana bajyanwa muri iyo mitwe bapfa nyuma y’ibyumweru bike, hanyuma imiryango yabo igahamagarwa ngo ize gutwara imibiri yabo.
Nubwo TikTok ivuga ko ibuza kandi ikuraho konti zishyigikira cyangwa zishakira abantu imitwe yitwaje intwaro, ubushakashatsi bwerekanye ko konti nyinshi zimara amezi menshi zikora, ndetse izafunzwe zigahita zisimbuzwa izindi nshya.
Iki kibazo cyatumye impirimbanyi n’inzego za leta zisaba ingamba zikomeye zo kurinda abana n’urubyiruko ibikangisho bikomeje gukwirakwizwa binyuze ku mbuga nkoranyambaga.