Christopher, Marina na Kenny Sol bagiye guhurira n’ibyamamare byo muri Uganda mu iserukiramuco rikomeye

Ni iserukiramuco ryateguwe na KEP Promotions Ltd, rigamije guteza imbere ubufatanye hagati y’abahanzi bo mu Rwanda no muri Uganda, binyuze mu bikorwa by’imyidagaduro no gusangira umuco binyuze mu ndirimbo.

Iri serukiramuco ryitezweho gutanga icyerekezo gishya mu ruganda rw’imyidagaduro rwo mu karere. Biteganyijwe ko rizajya ribera mu bihugu byombi ku buryo buhoraho, rihinduka urubuga rwo guhuza abafana n’abahanzi baturutse impande zitandukanye.

Ku rutonde rw’abahanzi bazaririmba harimo abanyarwanda: Christopher uzwi mu ndirimbo nka ‘, Haso na Mon Amour, Niyo Bosco ufite ubuhanga budasanzwe mu bwanditsi, ndetse akaba aherutse gusohora indirimbo ‘Daddy God’,

• Marina uri mu bahanzikazi bagezweho mu Rwanda, unitegura gusohora Album nshya, Juno Kizigenza umaze kuba ubukombe mu njyana ya Afrobeat, unaherutse kwizihiza imyaka itanu ishize ari muziki, ndetse na Kenny Sol, umwe mu bahanzi bari gukora neza mu Karere, unaherutse gusohora indirimbo ‘Dejavu’.

Uganda izahagararirwa n’ibyamamare birimo: Jose Chameleone umaze imyaka myinshi mu muziki, akaba aherutse gutaramira i Kigali, Ykee Benda, umuhanzi ukomeye mu njyana ya Pop na Afrobeat, Ava Peace n’umuvandimwe wa Chameleone, Dax Vibes, nabo bazaririmba muri iki gitaramo.

Abategura iri serukiramuco bavuze ko intego zabo ari uguhuza abahanzi n’abakunzi babo mu buryo burambye, no kongera ubufatanye hagati y’ibihugu byombi.

Iri serukiramuco kandi rije mu gihe abahanzi nyarwanda barimo gushaka uko bagaragara ku masoko yo hanze, kandi Uganda ikaba iri mu bihugu bifite isoko rinini ry’umuziki n’abafana bafite inyota y’ibihangano bishya.

Ibirori bizabera Lugogo Cricket Oval i Kampala ku wa Gatandatu, tariki ya 26 Nyakanga 2025. Ibiciro by’amatike byashyizwe mu byiciro bitatu bisanzwe: Gold: 100,000 UGX, Silver: 50,000 UGX ndetse na Bronze: 30,000 UGX. Ku meza y’abantu 4: 1,000,000 UGX, ameza y’abantu 8: 3,000,000 UGX, n’aho aeza y’abantu 12: 5,000,000 UGX

Iri serukiramuco rizitabirwa n’abantu b’ingeri zitandukanye barimo abafana, abanyamakuru, abanyabugeni n’abandi bafite aho bahuriye n’uruganda rw’imyidagaduro.

Ku bahanzi nyarwanda, kwitabira iri serukiramuco ni amahirwe yo kwigaragaza ku isoko ryo hanze, no gukomeza guteza imbere ibihangano byabo mu Karere.

Christopher amaze igihe ataramira mu bihugu bitandukanye, ariko kuba agiye kongera kugaragara i Kampala, ni intambwe ikomeye mu kongera kuganisha umuziki we ku ruhando mpuzamahanga. Ndetse, anaherutse kugaragaza ko ari kwitegura gusohora Album “H20”.

Marina nawe amaze kwiyubaka nk’umwe mu bahanzikazi bafite inyota yo gukorana n’amasoko akomeye, mu gihe Niyo Bosco agenda ashimangira ko indirimbo zifite ubutumwa zinashobora gusohoka mu Rwanda.

Abahanzi Nyarwanda barimo Juno Kizigenza, Kenny Sol, Christopher, Marina na Niyo Bosco bagiye guhurira mu iserukiramuco muri Uganda

Kenny Sol yatumiwe muri iri serukiramuco mu gihe aherutse gutandukana na 1:55 AM 

Christopher ari ku rutonde rw’abahanzi bazaririmba muri iri serukiramuco rigamije guhuza abanyarwanda n’abanya-Uganda

Marina, niwe muhanzikazi rukumbi wo mu Rwanda ugaragara ku rutonde rw’abatumiwe

KANDA HANO UREBE INDIRIMBO 'NDARAHIRA' Y'UMUHANZIKAZI MARINA