Chriss Eazy yujuje imyaka 25: Isabukuru yabaye urwibutso rwa Mama we witabye Imana mu 2025

Ni iya mbere yizihije nyuma y’aho Mama we yitabye Imana ku wa 13 Kamena 2025.

“Sinigeze ntekereza ko nzizihiza isabukuru udahari…”

Mu butumwa yashyize kuri konti ye ya Instagram kuri uyu wa Gatanu tariki 27 Gashyantare 2026, Chriss Eazy yafunguye umutima, agaragaza amarangamutima avanze y’ibyishimo n’agahinda.

Yavuze ko atigeze atekereza ko yazizihiza isabukuru y’amavuko Mama we atakiri kumwe na we. Mu magambo ye, yasobanuye ko atigeze yemera mu mutima we ko umunsi umwe yazishimira ubuzima yamuhaye, atari kumwe “n’umubyeyi wabuhaye igisobanuro.”

Mu yandi magambo, yashakaga kuvuga ko ubuzima bwe butari impano gusa yo kubaho, ahubwo bwari bufite agaciro n’icyerekezo kubera Mama we. Kuri we, Mama ntiyari uwamubyaye gusa, ahubwo yari n’uwamwigishije kubaho, gukunda no kumenya icyo ubuzima busobanuye.

“Uko iminsi ishira, ni ko mbona ko byinshi byanjye ari wowe”

Chriss Eazy yakomeje agaragaza ko n’ubwo umubyeyi we atakiri kumwe na we mu buryo bw’umubiri, akomeza kumwiyumvamo mu buzima bwe bwa buri munsi.

Yavuze ko amusengera buri munsi. Kandi uko ibihe bihita, agenda arushaho gusobanukirwa ko byinshi bimuranga ari ibyamuvuyeho.

Yasobanuye ko uburyo atekereza, uko akunda abantu, n’uko yitwara mu buzima, byose bifite ishusho ya Mama we. Mu mvugo yoroshye, yashakaga kuvuga ko Mama we atigeze amusiga; ahubwo amurimo.

Mu gusoza ubutumwa bwe, Chriss Eazy yagaragaje icyizere n’icyifuzo cy’umwana wifuza ko umubyeyi we yamwishimira.

Yavuze ko yizera ko ari kugerageza kuba umuntu watuma Mama we amwishimira. Yongeraho ko atekereza ko aho ari hose, yaba akimureba kandi amusekera. Yagaragaje ko amukumbuye cyane kandi ko amukunda.

Mu bamuhaye ubutumwa bwo kumwihanganisha no kumwifuriza isabukuru nziza, harimo Junior Giti usanzwe ari umujyanama we.

Yamubwiye ko Mama we amwishimira aho ari mu ijuru, kandi ko yishimira umugabo ari kugenda avamo. Yamwifurije kandi ko yazagira indi minsi myinshi y’amavuko.

Ni amagambo yagaragaye nk’ahumuriza, amwibutsa ko gukura kwe nk’umuntu nko muhanzi ari bwo buryo bwo gukomeza guha icyubahiro uwamubyaye.

Mu myaka ishize, Chriss Eazy yizihizaga isabukuru ari umwe mu bahanzi bari kuzamuka byihuse, indirimbo ze zikunzwe n’urubyiruko, izina rye rigenda riba rinini. Ariko ku myaka 25, isabukuru ye yahindutse umunsi wo gutuza, kwibuka no gusenga.

Ni umunsi ugaragaza ko inyuma y’ibyishimo by’umuziki n’ibirori byo ku rubyiniro, haba hari umutima w’umuntu ushobora kuba uremerewe n’ibikomere bitabonerwa amaso.

Ku myaka 25, Chriss Eazy ari mu cyiciro cyo gukura no gufata ibyemezo bikomeye mu buzima bwe n’umuziki we. Ariko nk’uko yabivuze, uko agenda akura ni ko arushaho kubona ko byinshi muri we ari Mama we.

Iyi sabukuru rero ntiyari iy’imyaka gusa; yari n’iy’urukundo rutazima, urwibutso rutibagirana n’isezerano ryo gukomeza kubaho mu cyubahiro cy’uwamuhaye ubuzima.

View this post on Instagram

A post shared by 𝓒𝐡𝐫𝐢𝐬𝐬𝐄𝓪𝔃𝔂😋 (@chrisseazy_)

Ku myaka 25, Chriss Eazy yizihije isabukuru ya mbere atari kumwe na Mama we, ayigira umunsi w’urwibutso, isengesho n’isezerano ryo gukomeza kumutera ishema

Isabukuru y’ibyishimo n’agahinda: Chriss Eazy yavuze ko uko akura ari ko arushaho kubona ko byinshi muri we ari Mama we witabye Imana muri 2025

KANDA HANO UBASHE KUREBA INDIRIMBO ‘CHOCOLATE’ YA CHRISS EAZY