Chriss Eazy usanzwe ufata amashusho y’indirimbo yasohoye indirimbo ye nshya yise ‘Amashu’-VIDEO

Chriss Eazy si izina rishya mu matwi ya benshi. Muri Mata 2020, yashyiditse n’umuhanzi Sat-B wo mu Burundi amushinja kwigana indirimbo ye yise ‘Ese urabizi’ nta burenganzira yamuhaye. Muri Nzeri 2020, bombi bariyunze.

Chriss yegukanye irushanwa rya Talent Zone 2016 ndetse n’irya Europe HiHop Fest 2019.

Uyu musore yize gutunganya amashusho akorana n’abahanzi bagezweho muri iki gihe. Ni we wihishe inyuma y’amashusho y’indirimbo za Vestine na Dorcas zirimo nka ‘Ibuye’, ‘Nahawe ijambo’, ‘Adonaii’ n’izindi z’aba bahanzikazi baherutse gusubira ku ishuri.

Chriss Eazy afite studio y’umuziki yashinje yise Eazy Filmz ari nayo itunganya indirimbo z’abahanzi batandukanye. Muri Eazy Filmz akorana n’abarimo Sam Swith ufata amashusho, Hussein Traole utegura ahafatirwa amashusho, Young C Designer umwambika n’abandi.

Hejuru yo kuba atunganya indirimbo anakora umuziki. Uyu musore abarizwa mu inzu ifasha abahanzi mu bya muzika yitwa Giti Business Group yashinzwe na Junior Giti uzwi mu gusobanura filime.

Kuva yatangira gufashwa n’iyi nzu, Chriss Eazy amaze gusohora indirimbo ebyiri harimo ‘Fasta’ imaze kurebwa n’abantu basatira ibihumbi 6000 ndetse na ‘Amashu’ yasohoye mu ijoro ry’uyu wa Kane tariki 21 Ukwakira 2021.

Chriss Eazy yabwiye INYARWANDA ko iyi ndirimbo igenewe abantu bari mu munyenga w’urukundo. Ati “Amashu n’indirimbo yagenewe abantu bakundana. Ni indirimbo isobanura uburyohe bw’urukundo mu bantu bakundana."

Uyu musore yavuze ko batorohewe no gufata amashusho y’iyi ndirimbo bitewe ‘n’ibintu byiza twifuzagamo’. Avuga ko bagiye bakora mu bihe bitandukanye kugira ngo babashe kubona neza amashusho bashakaga, avuga ko buri umwe bakoranye yari ashyize umutima kuri iyi ndirimbo. 

Amajwi y’iyi ndirimbo (Audio) yatunganyirijwe muri Country Records na Producer Element inononsorwa na Bob Pro n’amashusho yafashwe na Samy Switch.

Amashusho y’iyi ndirimbo (Video) agaragaramo umubyinnyi Titi Brown uzwi mu ndirimbo zitandukanye, abakobwa barimo Fiona Lee na Tonny bifashishijwe nk’abakinnyi b’imena. Harimo kandi Jojo Breezy, Danny Dancer, Aspino Dancer n’abandi.      Chriss Eazy yasohoye amashusho y’indirimbo ye nshya yise ‘Amashu’ Chriss Eazy abinyujije muri Eazy Filmz amaze gufata amashusho y’indirimbo z’abahanzi barimo Vestine na Dorcas n’abandi zikunzwe    Chriss Eazy ari muri Label yitwa Giti Business Group ya Junior Giti uzwi mu gusobanura filime

KANDA HANO UREBE AMASHUSHO Y’INDIRIMBO ‘AMASHU’ YA CHRISS EAZY

">