Chorale de Kigali yafashije amagana y’abantu kwizihiza Umunsi w’Umuziki ku Isi (AMAFOTO+ VIDEO)

Iki gitaramo cyahuje abahanzi b’abanyempano n’abaririmbyi b’inzobere mu muziki wa kera n’uwa none, cyabereye mu muryango mpuzamahanga w’abakunda umuziki, kikaba cyagize uruhare rukomeye mu gusubiza Abanyarwanda mu rugendo rw’amateka y’umuziki w’isi, uhereye ku bikoresho bya kera cyane kugeza ku bihangano by’iki gihe.

Cyari kigamije kugaragaza amateka y’ivuka n’ihindagurika ry’umuziki kuva mbere ya Kirisitu kugeza ku muziki w’iki gihe. Cyateguwe mu buryo bwa kinyamwuga, gihuriza hamwe injyana, amateka, ubuhanzi, imyambarire n’inkuru ya muzika mu ngeri zayo zose.

Mu bitabiriye iki gitaramo harimo abayobozi bakomeye barimo Ambasaderi w’u Bufaransa mu Rwanda, Nyakubahwa Antoine Anfré, na Minisitiri w’Ububanyi n’Amahanga n’Ubutwererane, Amb. Olivier Nduhungirehe, hamwe n’abakunzi ba muzika baturutse imihanda yose.

Igitaramo cyatangiye ahagana saa moya n’igice z’ijoro, hatangwa icyubahiro ku muziki wo mbere ya Kirisitu. Aha, abahanzi nka Dieudonné Murengezi na João bashimishije abantu mu bihangano bikomoka ku myaka ibihumbi 3 mbere ya Yezu, harimo gucuranga ku mwirongi wa “Divje Babe” wo muri Slovenia, indirimbo ya kera cyane yitwa Hurrian Hymn No. 6 yo muri Mesopotamia (1400 BC), ingoma z’Abashinwa ndetse n’indirimbo yo mu Bugereki (Seikilos Epitaph) ibarwa mu ndirimbo za mbere zanditswe.

Igice gikurikiraho cyibanze ku muziki wabayeho nyuma ya Kirisitu, aho Chorale de Kigali yaririmbye mu buryo bwuje ubuhanga nk’indirimbo Salve Regina (1050 AD) n’uduce twa Messiah twa Handel turimo I know that my Redeemer Liveth (Adeline Tecla), The People That Walked in Darkness (Ambika Sixte) na Hallelujah Chorus, hamwe n’iyakunzwe ku isi yose ya UEFA Champions League.

Mu gice cy’umuziki wo mu gihe cya Klasiki n’igihe cy’Aba-Romantique, Chorale de Kigali n’abashyitsi batandukanye baririmbye ibihangano by’abahanzi b’ibihe byose nka Mozart, Giuseppe Verdi, Rossini, Offenbach, Carl Maria von Weber, ndetse na Frédéric Chopin.

Harimo indirimbo zakunzwe nka Caro Mio Bene ya Giuseppe Giordani (Monique), La Calunnia ya Rossini (Fidele), ndetse na Funiculi Funicula ya Luigi Denza (Isaac, Gilbert na Eric), n’iyakunzwe cyane mu ndirimbo za gisirikare zo mu Butaliyani O Surdato ’nnammurato’ yaririmbwe na Aristide Uyisenga.

Mu gice cy’umuziki w’iki gihe, haririmbwe indirimbo zifite ubusobanuro bukomeye nk’Ave Maria ya Vladimir Vavilov (Adeline & Philmine), I Feel Pretty ya Leonard Bernstein (Rosine Mujawamariya), ndetse n’iz’Abanyarwanda nka Nsigaye nkumbura uwo nakunze ya Cyprien Rugamba, Turate Rwanda, Nyamurangwa n’impuhwe na Imihigo yacu na Charles Mudahinyuka.

Abandi bahanzi bagaragaye ni Cedrick, waririmbye Theme from Schindler’s List, Groove Blues n’indirimbo ya gikirisitu Amen, hamwe na Rosine, Simbi, Gemaine n’abandi benshi bari bashyize hamwe imitima n’amajwi yabo mu ndirimbo nka Vierge Marie.

Mu kiganiro n’itangazamakuru, Perezida wa Chorale de Kigali, Jean Claude Hodari, yavuze ko iki gitaramo cyari gisubiza icyifuzo cy’abafana.

Avuga ati “Abakunzi bacu bamaze igihe batwifuriza gukorana igitaramo kindi kitari icy’iminsi mikuru ya Noheli. Twabonye ko Umunsi Mpuzamahanga w’Umuziki ari amahirwe yo kongera guhura nabo, tukishimira aho umuziki wageze kandi tukabibereka mu buryo butandukanye.”

Yongeyeho ko ubwitange, imyitozo n’ikinyabupfura cy’abaririmbyi aribyo byatumye igitaramo kigenda neza. Chorale de Kigali yashinzwe mu mwaka wa 1966 n’abaririmbyi 20, benshi muri bo bari barize muri Seminari. Ubu ifite abaririmbyi barenga 150, aho 60% ari urubyiruko.

Ni imwe mu ma-chorale akunzwe cyane mu Rwanda no hanze yarwo, bitewe n’ubuhanga, uburyohe bw’amajwi n’ubutumwa butangwa binyuze mu muziki.

View this post on Instagram

A post shared by Kigali Universe (@kigali_universe)

Minisitiri Olivier Nduhungirehe na Ambasaderi w’u Bufaransa mu Rwanda, Antoine Anfré, n’abandi bayobozi bari mu bitabiriye igitaramo

Abahanzi ba Chorale de Kigali baririmba mu gitaramo “Voices in Harmony” mu ijoro ryo kwizihiza Umunsi Mpuzamahanga w’Umuziki 

Abagize Chorale de Kigali bemeje ko umuziki ari ururimi rusangiye n’abantu bose 

Jean Claude Hodari, Perezida wa Chorale de Kigali, yashimiye abafana n’abagize uruhare muri iki gitaramo 

Iki gitaramo cyahuje abahanzi b’abanyempano n’abaririmbyi b’inzobere mu muziki wa kera n’uwa none 

Iki gitaramo cyateguwe ku rwego rwo hejuru na Chorale de Kigali, cyabaye igihamya ko umuziki uhuza ibihe, imico n’amateka

Iki gitaramo cyashimangiye ko u Rwanda rwihagazeho mu bijyanye n’ubuhanzi n’umuco w’umuziki w’isi yose

CHORALE DE KIGALI YARIRIMBYE INDIRIMBO YA EUFA CHAMPIONS LEAGUE YAMAMAYE KU RWEGO RW'ISI

BARIRIMBYE INDIRIMBO YAMAMAYE NKA 'U RWANDA RW'EJO RUZAMENYA GUSOMA'

CHORALE DE KIGALI YARIRIMBYE INDIRIMBO 'GUSAAKAARA' MU RWEGO RWO KWIBUKA BURAVAN

KANDA HANO UREBE CHORALE DE KIGALI IRIRIMBA INDIRIMBO YAMAMAYE IZWI NKA 'CHIQUITITA'