Chorale de Kigali igiye gukora igitaramo cyo kwizihiza Umunsi Mpuzamahanga w’Umuziki

Iki gitaramo cyiswe “Voices in Harmony (VH)” kizaba ku Cyumweru tariki ya 21 Kamena 2026, kibere mu Nzu Mberabyombi y’Ikigo cy’Igihugu cy’Imisoro n’Amahoro (RRA) ku Kimihurura, guhera saa kumi n’ebyiri z’umugoroba.

Abifuza kuzacyitabira bamaze gutangira kugura amatike binyuze kuri telefoni bakanda *669*19# cyangwa banyuze ku rubuga rwa Sinc Events. Hari ibyiciro bitatu by’amatike birimo irya 15,000 Frw, irya 25,000 Frw ndetse n’irya 35,000 Frw.

Iki gitaramo kigiye kuba ku nshuro ya kabiri giteguwe na Chorale de Kigali ku munsi mpuzamahanga wahariwe umuziki. Ni gahunda igamije kuzirikana uruhare rw’umuziki mu buzima bw’abaturage, no gukomeza guteza imbere umuco wo gukunda no gusigasira umuziki uhimbanywe kandi uririmbwa mu buryo bw’ubuhanga.

Mu mwaka ushize wa 2025, igitaramo nk’iki cyabereye muri Kigali Universe, aho cyitabiriwe n’abakunzi benshi ba Chorale de Kigali banyuzwe n’ibihangano byatanzwe muri uwo mugoroba.

Muri uyu mwaka, abazitabira bazanyurwa n’umwihariko w’indirimbo zatoranyijwe. Ubuyobozi bwa Chorale de Kigali bwatangaje ko gahunda y’uyu mwaka izibanda cyane ku muziki wa ‘classique’ wo mu bihe bitandukanye, ariko kandi hakanumvikanamo indirimbo nyarwanda zakunzwe kuva kera, zateguwe muri iyo njyana yihariye izwiho gutanga ubutumwa n’ubwiza bw’umuziki bidasanzwe.

Ni igitaramo gitegerejwe nk’umwanya mwiza wo guhuza abakunda umuziki nyarwanda n’uw’amahanga uririmbwa mu buryo bwa korali, mu mwuka wo gusangira ibyishimo no kwizihiza umuziki nk’ururimi ruhuza abantu batandukanye.

Umunsi Mpuzamahanga w’Umuziki watangiye kwizihizwa mu Bufaransa mu 1985 mbere yo gukwira mu bindi bihugu by’u Burayi no ku yindi migabane y’Isi.

Kugeza ubu wizihizwa mu bihugu birenga ijana, aho ibikorwa bitandukanye by’umuziki bikorwa hagamijwe guha agaciro abahanzi no kwegereza abaturage ibihangano byabo.

Mu Rwanda, kwizihiza uyu munsi byatangiye mu 2011 ku bufatanye n’Ikigo cy’Abafaransa mu Rwanda (Institut Français du Rwanda), aho ibikorwa bya mbere byabereye ku Kimisagara byibanda cyane ku muziki wa kizungu.

Chorale de Kigali ivuga ko yiyemeje gukomeza kugira uyu munsi umwe mu mwihariko wayo, itegurira abakunzi b’umuziki ibitaramo bibibutsa ubwiza n’agaciro by’umuziki wa classique, by’umwihariko uwaririmbwe mu Kinyarwanda no mu zindi ndimi zitandukanye.

Igitaramo cya “Voices in Harmony” kizaba ari amahirwe ku bakunzi b’umuziki wo kuruhuka, gutekereza no kwidagadura mu buryo bwuje ubuhanga, mu ijwi rimwe rya Chorale de Kigali ikomeje kubaka izina mu ruhando rw’umuziki wa korali mu Rwanda.

Chorale de Kigali iri mu zikomeye muri Kiliziya Gatolika yatangaje ko igiye gukora igitaramo kizahuzwa no kwizihiza Umunsi Mpuzamahanga w’umuziki

Chorale de Kigali ivuga ko izakora iki gitaramo ku wa 21 Kamena 2026 ku Kimihurura mu Mujyi wa Kigal