Chorale Ababyeyi ADEPR
Muhima ni korali ikorera umurimo w'Imana wo kogeza ubutumwa bwiza bwa Yesu
Kristo binyuze mu ndirimbo ku itorero rya ADEPR Paruwasi ya Muhima. Yavutse mu mwaka wa 1997 ikaba imaze imyaka 28 mu murimo
w'iyogezabutumwa. Igizwe n’abaririmbyi barenga 100 barimo abagabo n’abagore.
Umwe mu bayobozi b'iyi Korali, Uwamahoro Jeannine, yabwiye InyaRwanda ko hirya bavugaga mu ndirimbo nshya bashyize hanze kuri uyu wa Mbere, tariki 21 Mata 2025, ari hirya y'ubuzima busanzwe abantu babayemo muri iki gihe. Ati: "Twibutsaga abantu ko muri iyi si atariho iwacu n'ubwo duhari ariko duhari nk'abacumbitsi."
Yakomeje agira ati: "Turimo tuributsa abantu bashavujwe n'amakuba yo mu isi ko hirya y'ubu buzima, hirya y'uyu mubabaro hari ubuzima bw'umunezero. Nitugera mu ijuru tuzishima, tuzanezerwa, nta mibabaro, nta gupfa nta gupfusha."
Uwamahoro yavuze ko bahimbye iyi ndirimbo bagamije gukumbuza abantu ijuru. Bayihimbye bayobowe nijambo ry'Imana riboneka muri Bibiliya, by'umwihariko muri Matayo:24 hakangurira abantu kuba maso.
Iyi Korali ifite amateka akomeye mu myaka 28 imaze mu bikorwa by'ivugabutumwa dore ko yavutse tariki 8 Nyakanga mu 1997. Aba babyeyi bahamya ko igitangaza cya mbere Imana yabakoreye ari uko yabahaye Kristo kandi ikabagura haba mu buryo bw'umubare ndetse no mu bw'imiririmbire. Bavuga ko batangira byari bigoye cyane, ari abagore gusa ariko Imana iza kubazanira n'abagabo batangira gukorana umurimo. Batangiye ari abagore 7, ariko ubu iyi korali igizwe n'abaririmbyi 113.
