Nyuma y'aho umuherwe mushya wa Chelsea Todd Boehly yujuje iminsi 100 aguze iyi kipe yari mu biganza by'Umurusiya Roman Abramovich, yasanze bidakwiye ko ikomeza gutozwa na Thomas Tuchel watangiye umwaka nabi.
Ku mugoroba washize, Iyi kipe yatakaje umukino wa mbere wa UEFA Champions League i Zagreb muri Croatia, aho yatsinzwe igitego cyo mu gice cya mbere ikabura ibisubizo byo kucyishyura.
Umutoza Tuchel yakoze impinduka eshanu mu kibuga, ariko byose byanga kugira icyo bihindura kugeza ubwo yipfutse ingofero mu maso, yicara ku ntebe agaragaza ko nta kindi gisubizo afite.
Chelsea iri ku mwanya wa gatandatu muri Shampiyona y' u Bwongereza nyuma y'imikino itandatu, kuko naho yatangiye nabi, itakaza imikino irimo n'uwo yatsinzwe isuzuguwemo na Leeds United yayipfunyikiye ibitego 3-0.
Tuchel
Mu itangazo Chelsea yanditse yagize iti ''Mu izina rya buri wese muri Chelsea FC, ikipe irashimira Thomas n'abo bakoranye ku bw'imbaraga zabo zose mu gihe bamaranye nayo".
"Birakwiye ko Thomas azagira umwanya mu mateka ya Chelsea nyuma yo gutwara igikombe cya UEFA Champions League, UEFA Super Cuip ndetse n'igikombe cy'isi cy'ama-Club".
Iyi kipe yakomeje iti "Mu gihe itsinda rishya rya nyir'ikipe rigeze ku minsi 100 kuva ryayifata kandi mu gihe rikomeje akazi karyo kugira ngo ikipe itere imbere, ba nyir'ikipe bashya bemeje ko ari cyo gihe gikwiye cyo gushyiraho inzibacyuho''.
Chelsea yongeyeho ko bazakora 'byihuse' kugira ngo bashyireho umutoza mushya mu gihe abari bungirije Tuchel bahawe kuba batoza ikipe mu gihe hatarashakwa undi mutoza mukuru.
Thomas Tuchel yageze muri Chelsea muri Mutarama 2021, asimbuye Frank Lampard na we wari wirukanwe. Mu mikino 100 y'amarushanwa yatoje, yatsinzemo 60, anganya 24, atsindwa 16. Yatwaye UEFA Champions League 2021, Super Cup n'igikombe cy'isi cy'ama-Club.
Tuchel yabanje kugira ibihe byiza