Kuri uyu wa Gatatu tariki ya 15 Mata 2026 ni bwo hasojwe imikino yo kwishyura ya 1/4 cya UEFA Champions League. Amaso yose yari ahanze kuri Allianz Arena aho FC Bayern Munich yari yakiriye Real Madrid.
Umukino watangiye umunyezamu wa FC Bayern Munich, Manuel Neuer akora amakosa ubundi Arda Guler ahita ayabyaza umusaruro afungura amazamu ku munota wa mbere.
FC Bayern Munich yahise iba nk'iriye amavubi maze ku munota wa 6 Aleksandar Pavlovic ahita yishyura ahawe umupira Joshua Kimmich kuri koroneri.
FC Bayern Munich yakomeje gusatira izamu ariko ku munota wa 29 Real Madrid ibona igitego cyatsinzwe na Arda Guler. Ubwugarizi bwa Real Madrid bwakomeje gukora amakosa ubundi ku munota wa 38 Harry Kane ahita atsinda igitego cya kabiri ahawe umupira na Dayot Upamecano.
Mbere y’uko igice cya mbere kirangira Kylian Mbappé yatsinze igitego cya gatatu ahawe umupira na Vinicius Junior.
Mu gice cya kabiri FC Bayern Munich yaje ikomeza kwatsa umuriro imbere y’izamu rya Real Madrid, gusa iyi kipe yo mu Bufaransa nayo ikanyuzamo ikagera imbere y’izamu nk'aho Kylian Mbappé yarekuye ishoti riremereye ariko Manuel Neuer aratabara.
Ku munota wa 70 Mbappé yahaye umupira mwiza Vinicius ashobora kuwushyira mu izamu ariko birangira umunyuze mu maguru.
Ku munota wa 86 Eduardo Camavinga yabonye ikarita ya kabiri y’umuhondo bihinduka umutuku, Real Madrid isigarana abakinnyi 10 mu kibuga. Bidatinze ku munota wa 89 Luis Diaz yahise atsinda igitego cya gatatu cya FC Bayern Munich ahawe umupira na Jamal Musiala.
Ku munota wa 90+4 Michael Olise yatsinze icya Kane ubundi FC Bayern Munich ihita isezerera Real Madrid ku giteranyo cy’ibitego 6-4 yerekeza muri 1/2.
Undi mukino wakinwe kuri uyu wa Gatatu, Arsenal yanganyije na Sporting 0-0 ihita iyisezerera nyuma y’uko mu mukino ubanza yari yayitsinze 1-0.
Amakipe ane yageze muri 1/2 cya Champions League y'uyu mwaka ni PSG, Atlético Madrid, Bayern Munich na Arsenal.
FC Bayern Munich yasezereye Real Madrid
Bayern Munich yageze muri 1/2 itsinze Real Madrid