Ikipe ya Chelsea ibarizwa i London mu Bwongereza, yamaze gusinyisha umutoza mushya Enzo Maresca uherutse kuzamura ikipe ya Leicester City mu cyiciro cya mbere , 'English Premier League'.
Umutaliyani Enzo Maresca yasinye amasezerano y'imyaka itanu atoza Chelsea, aho yaje asimbuye umunya Argentina Mauricio Pochettino.
Umunya Argentina Mauricio Pochettino uherutse kwirukanwa na Chelsea, ntabwo akiri kuramba mu makipe kuko aheruka gutoza Paris Saint-Germain, Tottenham Hotspur na Chelsea, izo kipe zose akaba yaratandukanye nazo zimwirukanye.
Umutaliyani Enzo Maresca w'imyaka 44 y'amavuko, yavuye muri Leicester City nyuma y'umwaka umwe ayitoza kuko yatangiye kuyitoza muri Kamena 2023.
Enzo Maresca, mu magambo yatangaje nyuma yo guhabwa amasezerano na Chelsea, yavuze ko yatunguye no kwisanga mu ikipe nkuru kandi ifite ibigwi.
Yagize ati "Ni ibyishimo cyane kuri njye. Ni inzozi za buri mutoza kwisanga mu ikipe nkuru nka Chelsea uri umutoza mukuru. Njye natunguwe n'aya mahirwe.
Gutoza Chelsea ni iby'agaciro, kandi ni akazi gakomeye. Gutoza abakinnyi bato bafite impano nk'aba, ndetse no gukomeza imigenzo ya Chelsea yo gutsinda."
Kuva Chelsea yajya mu biganza by'umuherwe ukomoka muri Leta Zunze Ubumwe za Amerika, Todd Boehly, Enzo Maresca abaye umutoza wa Gatandatu ku ngoma ye, kandi uyu umukire yabaye nyiri Chelsea kuva muri 2022.
Enzo Maresca azatangira inshingano zo gutoza Chelsea muri Nyakanga.
Umutaliyani Enzo Maresca yasinye amasezerano y'imyaka itanu ari umutoza mukuru wa Chelsea
Enzo Maresca asimbuye Mauricio Pochettino uherutse kwirukanwa
