Cardi B yavuze ko umwana we w'umuhungu uzatera umukobwa inda azahita amuvira mu nzu

Uyu muhanzi yavuze ko atabiterwa no kutagira umutima mwiza, ahubwo ko yemera ko kubyara umwana ari icyemezo cy'umuntu mukuru, bityo ugifashe agomba no kwemera inshingano zose zijyana nabyo.

Cardi B yabigarutseho mu kiganiro cyatambutse kuri Instagram Live ku wa 23 Nyakanga 2026, aho yasobanuye ko atazemera ko umwana we akomeza kubaho yishingikirije ku babyeyi kandi yamaze kuba umubyeyi na we.

Yagize ati: "Umunsi umwe mu bahungu banjye azambwira ko yateye umukobwa inda, uwo munsi azahita apakira amvire mu rugo."

Yakomeje avuga ko uwo mwana atazongera kubona amafaranga cyangwa ubundi bufasha bumuturutseho nk’umubyeyi cyangwa ngo akomeze kuba mu nzu ye.

Ati: "Nta mafaranga ya mama, nta mafaranga ya papa, kandi nta no kuba munzu yabo."

Cardi B yavuze ko iyo umuntu yiyemeje kubyara umwana, aba agomba no kwiyemeza gukora, gushaka ubushobozi no kwita ku muryango.

Yavuze ko kubyara umwana atari ikintu cyo gukinisha, ahubwo ari icyemezo gisaba umuntu kuba mukuru no kwakira inshingano zose.

Uyu muraperikazi yavuze ko atabuza abahungu be kwakira abakobwa bakundana mu rugo, ariko ko hari amategeko bagomba kubahiriza.

Yavuze ko bashobora kuganira bari mu nzu, ariko imiryango igomba kuba ifunguye, agaragaza ko ashaka ko habaho igenzura no kubafasha kwirinda ibibazo bishobora kubaviramo gutwara inda bakiri bato.

Gusa yavuze ko ayo mahirwe yose ahita arangira igihe habayeho gutwara inda, kuko icyo gihe aba yumva umwana we ageze ku rwego rwo kwiyubakira ubuzima bwe.

Amagambo ya Cardi B yahise akwirakwira ku mbuga nkoranyambaga, aho bamwe bashimye uburyo ashaka kwigisha abana be kubazwa inshingano z'ibyemezo bafata.

Hari abavuze ko ari uburyo bwiza bwo kwigisha urubyiruko ko kuba umubyeyi bisaba kwitegura no kwigira, mu gihe abandi babona ko nubwo inshingano ari ingenzi, umubyeyi adakwiye guheza umwana we igihe ahuye n'ikibazo, ahubwo agomba kumuba hafi anamufasha kugikemura.

Ibyo yavuze byongeye gufungura impaka ku ruhare rw'ababyeyi mu kurera abana no kubatoza kubazwa inshingano z'ubuzima bwabo, cyane cyane iyo bageze mu myaka yo gufata ibyemezo bikomeye.