Cardi B yashimangiye ko Stefon Diggs yamutwaye umutima Offset ak

Cardi B na Offset batangiye gukundana mu ntangiriro za 2017. Bakoze ubukwe rwihishwa ku wa 20 Nzeri 2017, bwitabiriwe n’abo mu muryango wa hafi gusa. Igitangaje ni uko nyuma y’ukwezi kumwe gusa, Offset yamwambitse impeta ku rubyiniro mu ruhame batazi ko bari baramaze kurushinga.

Urukundo rwabo rwababyariye abana batatu beza: Kulture Kiari Cephus (wavutse ku wa 10 Nyakanga 2018), Wave Set Cephus (wavutse ku wa 4 Nzeri 2021), na Blossom Cephus (wavutse ku wa 7 Nzeri 2024). Cardi B yakundaga kugaragaza ibyishimo byo kuba umubyeyi, ariko akanavuga ku bibazo byo kubana no kurera abana mu buzima buri mu itangazamakuru.

Mu kwezi kwa Nzeri 2020, Cardi B yashyikirije inkiko impapuro z’ubusabe bwa gatanya, avuga ko Offset atamubaniye neza. Ariko nyuma y’icyumweru gito, barasubiranye, ndetse Cardi aza kuvuga ko yamukunze cyane ku buryo atashoboraga kumureka.

Icyakora muri Nyakanga 2024, yongeye gusaba gatanya ku nshuro ya kabiri, akiri mu gihe cyo gutwita umwana wa gatatu. Offset yasabye uburenganzira bwo kurera abana ku buryo bungana n’umugore, ndetse no kugenerwa indezo. Cardi B yarabyanenze cyane, amushinja kutita ku bana, avuga ko atigeze anabonana kenshi n’umwana wabo wa nyuma, Blossom.

Mu gihe yari ahanganye n’ibibazo by’itandukana, Cardi B yagiye ashimangira ko afite undi muntu umuba hafi akaba umukinnyi w’umupira w’amaguru Stefon Diggs.

Iby’urukundo rwabo byatangiye kuvugwa mu ntangiriro za 2025, ariko byemezwa ku mugaragaro mu mpera za Gicurasi ubwo bagaragaye bari kumwe ku bwato i Miami, basabana bishimye mu buryo Cardi B ubwe yashyize hanze kuri Instagram.

Nta magambo menshi yavuze, ariko amashusho yagaragaje byinshi. Abafana be n’itangazamakuru bahise babifata nk’itangazwa ku mugaragaro ry’undi mukunzi mushya.

Abantu ba hafi ya Cardi B bavuga ko Stefon amuha ituze, urukundo, amahoro, n’ubwuzu atari yarigeze abona mbere. Nubwo urukundo rwabo rukiri rushya, bagiye bagaragara kenshi bari kumwe basohokanye mu ibirori no mu mikino kandi Cardi B ntajya azuyaza kumwerekana.

Cardi B atandukanye na Offset nta minsi iracaho bari mu nkiko za gatanya, Cardi B ahita abona umukunzi mushya.