Canal+ yazanye uburyo bushya bwo kuyireberaho Netflix n’abakunzi b’imikino bashyirwa igorora

Kuri uyu wa Gatanu, tariki ya 22 Kanama 2025 muri Gahunda yiswe “Back to Foot” ni bwo hatangijwe poromosiyo igenewe abakiriya ba Canal+ izajya ibaha kureba shene zose mu gihe cy’iminsi 15 mu gihe baguze ifatabuguzi bari basanganywe.

Iyi poromosiyo izajya ituma uyihawe areba imikino ikomeye yo ku mugabane w’i Burayi harimo Shampiyona y’Ubwongereza, Shampiyona ya Espagne, Shampiyona yo mu Bufaransa, iyo mu Budage….

Umuyobozi Mukuru wa CANAL+ Rwanda, Sophie Tchatchoua, yavuze ko atari Canal+ yakwemera gusigara inyuma mu kwerekana imikino igezweho ku ruhando rw’Isi. Ati “Tugiye korohereza Abanyarwanda mu buryo bakurikirana imikino ndetse myinshi binyuze kuri shene za Canal+.”

Uretse kuri aba bakiriya basanganywe ifatabuguzi, Canal+ yorohereje umuntu wese wifuza ifatabuguzi na decoder aho ibiciro byagabanyijwe ku rwego rushimishije. Decoderi yaguraga 10,000Frw ubu iri kugura 5000Frw mu gihe Installation yishyuzwaga 10,000Frw ari 5,000Frw.

Si ibyo gusa kuko nk’uko muri Canal+ bahorana udushya no gushyira igorora abakiriya babo, aho kuri ubu hashyizweho abonema yiswe “Ikirenga” ikubiyemo ibintu byose by’ikirenga umuntu yakwifuza kureba.

Iyi Abonema izajya igura 35,000Frw ikubiyemo amashene yose ya Canal+, DS TV ndetse na Netflix aho umuntu azajya ayireba adasabwe kujya kuyishyira nk’uko bisanzwe ko umuntu ushaka kureba Netflix ayishyura.

Si ku ruhande rw’imikino na Netflix gusa ahubwo Canal Plus yongereye imbaraga mu bisata by’imyidagaduro harimo cinema aho nko kuri shene ya Zacu TV hagiye gukomeza guca film nshya kandi nziza nyinshi mu rwego rwo kua hafi y’abakunzi b’imyidagaduro.