Ibi birori byiswe “10 Years Anniversary” byabereye muri Canada ku wa 2 Gicurasi 2026, kuva saa Cyenda z’amanywa bisozwa saa Moya z’umugoroba ku isaha yo muri Canada. Abitabiriye bari kumwe n’Umushumba Mukuru wa Elayono ku Isi, Rev. Prophet Ernest Nyirindekwe, ndetse na Pastor Goel Mayuru usanzwe ari umuramyi.
Prophet Ernest Nyirindekwe washinze Elayono yagaragaje ko uwo munsi wari uw’ijambo ribohora, ubuhanuzi, ubusabane n’amashimwe. Yanditse ku rukuta rwe rwa Instagram ko ibirori Elayono yizihirijemo isabukuru y’imyaka icumi imaze ibayeho, "wari umunsi w’Ijambo ribohora, Ubuhanuzi, ubusabane n’amashimwe.”
Abitabiriye ibi birori byabereye mu gihugu cya Canada bahimbaje Imana bayishimira cyane kuba yarabanye nabo mu rugendo rw'imyaka 10, ndetse banayisaba gukomeza kubana nabo mu bihe biri imbere. Bari babyambariye dore ko hafi ya bose bari bambaye imyenda y'umweru nk'ikimenyetso cy'Ukwera.
Abahanga mu bya Bibiliya bavuga ko imyenda y’umweru atari imyambarire gusa, ahubwo ni ikimenyetso cy’ubuzima bushya muri Kristo, ubuziranenge n’agakiza. Bishushanya ko umuntu yakiriwe n’Imana kandi yababariwe ibyaha bye, akaba ari ikimenyetso cy’uko “yambaye Kristo” mu buzima bushya.
Ibi birori bibaye mu gihe Prophet Ernest Nyirindekwe akomeje ibikorwa byo kwamamaza ubutumwa bwiza bwa Yesu Kristo mu bihugu bitandukanye. Mu minsi ishize yari mu Burayi aho yasuye u Bwongereza, Suwede n’u Bubiligi, akora ibikorwa byo gusengera abakristo, kubigisha no gusangira ubuhamya bw’ibyo Imana yakoze.
Nyuma y’izo ngendo, yageze muri Leta Zunze Ubumwe za Amerika, akomereza muri Canada aho yitabiriye ibirori bikomeye bya “10 Years Anniversary”. Izi ngendo z’ivugabutumwa zimugaragaza nk’umukozi w’Imana ufite icyerekezo mpuzamahanga, wiyemeje kugeza ubutumwa bwiza bwa Yesu Kristo ku mpera z’isi.
Ni urugendo rugaragaza ishyirwa mu bikorwa ry’Ibyakozwe n’Intumwa 1:8, havuga ko abizera bazahabwa imbaraga zo kuba abahamya kugeza ku mpera z’isi. Ibikorwa bye bigereranywa n’ingendo z’Intumwa Pawulo muri Bibiliya, bitewe n’uko agenda mu bihugu bitandukanye yigisha, asengera abantu kandi anafasha abatishoboye.
Mu 2007 ni bwo Prophet Ernest yatangiye umurimo w’Imana nyuma yo kwakira agakiza no guhabwa impano y’ubuhanuzi. Kugeza ubu amaze imyaka 19 mu murimo w’Imana. Itorero Elayono yashinze mu myaka 10 ishize rifite amashami mu bihugu birimo Canada, u Bwongereza, u Bufaransa n’u Bubiligi.
Prophet Ernest azwi cyane ku mpano y’ubuhanuzi no gukoreshwa n’Imana mu bitangaza, nk’uko bigarukwaho n’ubuhamya bw’abakristo benshi yasengeye. Ni umukozi w’Imana ukorana neza n’andi matorero ya Gikristo, kandi akunze gutumirwa mu biterane bitandukanye mu Rwanda no mu mahanga.
Uyu mushumba yanigishije mu nsengero zitandukanye yaba mu Rwanda no hanze zirimo CityLight Center Foursquare Gospel Church iyoborwa na Bishop Prof. Dr. Fidele Masengo, ndetse yanagaragaye kenshi muri Grace Room. Yanakoze urugendo shuri rw'iyobokamana mu gihugu cya Israel.
Ni umwe mu bapastori b’Abanyarwanda bakoresha cyane imbuga nkoranyambaga mu ivugabutumwa, aho kuri Instagram akurikirwa n’abarenga ibihumbi 159, akaba ari we mupasiteri uri ku mwanya wa mbere mu bakurikirwa cyane kuri uru rubuga.
Ibyo abahanga bavuga ku myaka 10 y’itorero nk'iyo Elayono iri kwizihiza:
Abahanga mu by’imibereho n’iyobokamana bavuga ko kugera ku myaka 10 ari intambwe ikomeye yerekana gukomera k’umuryango w'ivugabutumwa. Rodney Stark avuga ko itorero rigeze ku myaka 10 riba rimaze kuva mu cyiciro cyo gushingwa rikinjira mu cyiciro cyo kwizerwa no gukomera.
Peter L. Berger agaragaza ko iyo myaka ituma itorero rishyiraho imiterere ihamye, imiyoborere n’indangagaciro zirambye. Eileen Barker we avuga ko iyo itorero ritangiye kugera mu bihugu bitandukanye, biba bisobanuye ko rifite ubutumwa mpuzamahanga bushobora kurenga imbibi.
Mu mboni rusange y’aba bahanga, imyaka 10 ni ikimenyetso cyo gukura, gukomera no kwaguka kw’itorero, ndetse n’ubushobozi bwo kugira ingaruka nziza ku bantu benshi no ku isi muri rusange.
AMAFOTO Y'UKO IBIRORI BYA ELAYONO BYARI BIMEZE
Elayono yashinzwe na Prophet Ernest yakoreye muri Canada ibirori bikomeye byo kwizihiza isabukuru y’imyaka 10 imaze ibayeho