Mu itangazo ryasohotse nyuma y'iyi nama, CAF yavuze ko ishyigikiye ibisobanuro byatanzwe na Gianni Infantino n'Umunyamabanga Mukuru wa FIFA, Mattias Grafström, bemeye ko habaye amakosa mu mitegurire y'umushinga wa FIFA Forward Enterprise (FFE), ndetse banasaba imbabazi kubera ko Inama Nkuru ya FIFA n'amashyirahamwe y'ibihugu bitahawe umwanya uhagije wo kugishwa inama.
Perezida wa CAF, Patrice Motsepe, yavuze ko kwakira amakosa no kuyemera ari intambwe ikomeye, ashimangira ko imiyoborere myiza, gukurikiza amategeko n'umucyo ari ibintu Afurika idashobora na rimwe guteshukaho.
Yagize ati: "Kuri twe muri Afurika, kubahiriza amahame y'imiyoborere myiza, gukurikiza amategeko no gukorera mu mucyo ni ihame ridashobora kuganirwaho. Tuzakomeza gukorana na FIFA, amashyirahamwe ayigize n'abandi bafatanyabikorwa kugira ngo ayo mahame yubahirizwe."
Komite Nyobozi ya CAF yanongeye gutangaza ku bwumvikane busesuye ko ishyigikiye Gianni Infantino, inayishimira uruhare imaze imyaka igira mu guteza imbere umupira w'amaguru muri Afurika, ndetse inashima uburyo FIFA yateguye Igikombe cy'Isi cya 2026.
Iki cyemezo cya CAF kije mu gihe FIFA iherutse guhagarika umushinga wayo wari ugamije gushakira amafaranga amarushanwa y'Igikombe cy'Isi binyuze mu kugurisha imigabane y'inyungu zizava muri ayo marushanwa ku bashoramari bigenga. kimwe mu byateje impaka nyinshi, bituma FIFA yemera ko uburyo wakozwemo bwari burimo amakosa, nubwo yavuze ko amategeko yayo atigeze arengwaho.
Mu minsi ishize Kandi nibwo abayobozi bakomeye b'umupira w'amaguru muri Afurika na bo bagaragaje ko bashyigikiye Infantino. Barimo Perezida w'Ishyirahamwe ry'Umupira w'Amaguru muri Maroc, Fouzi Lekjaa, uwa Misiri Hany Abo Rida, uwa Niger Hamidou Djibrilla, n'uwa Mauritania Ahmed Yahya.
Uwahoze ari Umunyamabanga Mukuru wa CAF, Veron Mosengo-Omba, ubu uyobora Ishyirahamwe ry'Umupira w'Amaguru muri Repubulika Iharanira Demokarasi ya Congo (FECOFA), na we yagaragaje ko ashyigikiye Infantino, bavuga ko bafitanye umubano kuva bakiga muri Kaminuza yo mu Busuwisi.
Inkunga ya CAF ifite uburemere bukomeye muri FIFA kuko ihagarariye amashyirahamwe 54 mu 211 agize FIFA, bivuze ko Afurika ari imwe mu nkingi zikomeye z'amajwi ashobora kugena uzayobora FIFA. Mu kwezi kwa Mata uyu mwaka, amashyirahamwe yose agize CAF yari yamaze kwemeza ko azashyigikira Gianni Infantino kongera kwiyamamariza kuyobora FIFA.