APR FC yari yasabye CAF kwimurira ahandi uyu mukino uteganyijwe ku wa 5 Nzeri 2026, ivuga ko impamvu nyamukuru ari icyorezo cya Ebola kiri mu bice bitandukanye bya RDC.
CAF yari iherutse kwanga ubusabe bwa APR FC bwo gukinira uyu mukino hanze ya RDC, bituma iyi kipe y’Ingabo z’u Rwanda ijuririra icyo cyemezo ibinyujije mu Ishyirahamwe ry’Umupira w’Amaguru mu Rwanda (FERWAFA).
Nyuma yo gusuzuma ubujurire bwa APR FC, CAF yongeye kugumana icyemezo cyayo, bivuze ko umukino ubanza hagati ya APR FC na Les Aigles du Congo ugomba kubera muri RDC.
Kugeza ubu, APR FC ntiratangaza niba izitabira uyu mukino cyangwa niba hari indi ntambwe izafata nyuma y’icyemezo cya CAF.
Mu gihe APR FC itakwitabira uyu mukino, ishobora guhanishwa ibihano biteganywa n’amategeko agenga amarushanwa ya CAF ku makipe atitabiriye imikino.
Muri ibyo bihano harimo guterwa mpaga y’ibitego 3-0, guhagarikwa mu marushanwa Nyafurika mu gihe cy’imyaka ibiri ndetse no gucibwa amande ya 5,000 by’amadolari ya Amerika, ahwanye na miliyoni zisaga 7.3 Frw.
RDC ifite stade ebyiri zonyine zemewe na CAF kwakira imikino mpuzamahanga muri iki gihe. Ni TP Mazembe Stadium na Frédéric Kibassa Maliba Stadium, zombi ziherereye i Lubumbashi.
APR FC na Les Aigles du Congo bazahurira mu ijonjora rya mbere rya CAF Champions League, aho uzatsinda azakomereza mu cyiciro gikurikiraho.
Muri icyo cyiciro, ikipe izarokoka hagati ya APR FC na Les Aigles du Congo izahura n’izaba yatsinze hagati ya AS Port yo muri Djibouti na Zamalek SC yo mu Misiri.