Byanyeretse ko ndi gukora cyane - Bwiza ku cyizere yahawe na Bruce Melodie muri 'Summer  Country Tour' (VIDEO)

Ibi yabitangaje mu kiganiro yagiranye na InyaRwanda mbere y'igitaramo cya gatatu cya Summer Country Tour giteganyijwe kubera mu Karere ka Bugesera kuri uyu wa Gatandatu tariki ya 27 Kamena 2026.

Bwiza yavuze ko guhabwa amahirwe yo kuririmbana n'abahanzi bafite amateka akomeye mu muziki nyarwanda byamubereye isomo rikomeye ndetse bimuha icyizere cy'uko nawe ari mu rugendo ruzamugeza kure.

Yagarutse ku gitaramo cya mbere cyabereye i Musanze ku wa 13 Kamena 2026, avuga ko nubwo yari yabyiteguye, atakwirengagiza igitutu yari afite mbere yo kujya ku rubyiniro.

Yagize ati: "Ubwa mbere nagize ubwoba kuko nari ngiye gutaramana n'abahanzi banini. Ni abantu nakuze ndeba nkiri muto, bafite amateka akomeye mu muziki. Ariko nanone numvaga ari intambwe ikomeye ngezeho mu rugendo rwanjye."

Avuga ko nyuma yo kuririmba i Musanze, icyizere cye cyiyongereye ku buryo igitaramo cyakurikiyeho cyabereye i Nyagatare ku wa 20 Kamena cyamusanze yisanzuye kurushaho.

Ati: "I Nyagatare byari byoroshye cyane kuko nari namaze kumenyera uko ibi bitaramo bigenda. Byatumye ndushaho kwigirira icyizere no kumva ko nkiri mu murongo mwiza."

Bwiza yavuze ko impamvu ahora ashishikajwe no gukora imyitozo no kwitegura buri gihe ari uko yifuza kugera ku rwego rwo kuzajya akora ibitaramo bye bwite bizenguruka igihugu.

Yagize ati: "Mpora niteguye kuko simba nshaka ko hari undi muntu undusha. Ni yo mpamvu nkora mu myitozo buri gihe. Inzozi zanjye ni uko umunsi umwe nanjye nzagira ‘tour’ yanjye, kandi kugira ngo ibyo bishoboke bisaba kwitegura no gukora cyane."

Uyu muhanzikazi yavuze ko ikintu cyamukoze ku mutima kurusha ibindi ari uburyo Bruce Melodie yamugiriye icyizere akamushyira mu bahanzi baherekeje uru rugendo rw'ibitaramo, ruri kuba ku nshuro ya mbere mu Rwanda.

Yavuze ko atabona ibi nk'impanuka, ahubwo abifata nk'ubuhamya bw'uko ibikorwa bye biri kugenda byigaragaza.

Ati: "Narishimye cyane, kandi byanyeretse ko ndi gukora cyane. Umuntu ntiyapfa kuguhitamo ngo mugendane muri tour nk'iyi atakubonamo ubushobozi. Ndamushimira cyane kuba yarangiriye icyizere."

Summer Country Tour ni ibitaramo byateguwe na Bruce Melodie agamije kwegera abafana be hirya no hino mu gihugu, aho yahisemo kubifatanyamo n'abahanzi barimo The Ben, Kitoko na Bwiza.

Nyuma yo kunyura i Musanze no i Nyagatare, uru rugendo rugiye gukomereza mu Karere ka Bugesera, aho Bwiza avuga ko ari hamwe mu hantu yiteze gutanga igitaramo cyihariye, cyane ko ari akarere asanzwe abarizwamo.

Yavuze ko yateguye neza ibihangano azaririmba ndetse n'uko azitwara ku rubyiniro, ashimangira ko abafana bazabona impamvu bamwita umwamikazi. Ati: "Ni ko bigomba kugenda. Ikamba rizambikwa umwamikazi."

Kuva yatangira urugendo rwe rwa muzika, Bwiza yakomeje kwigaragaza nk'umwe mu bahanzikazi bafite ejo hazaza heza, aho indirimbo ze zakunzwe zirimo ‘Ready’, ‘Ogera’, ‘Ahazaza’ n'izindi zakomeje kumwubakira izina.

Kuba ari mu bahanzi baherekeje Summer Country Tour na byo abifata nk'indi ntambwe ikomeye imwerekeza ku nzozi zo kuzaba umwe mu bahanzi bakomeye bakora ibitaramo byabo bizenguruka igihugu n'akarere.

Bwiza yavuze ko kuba Bruce Melodie yaramuhisemo mu bahanzi bari kumwe muri “Summer Country Tour” ari ikimenyetso cy'uko ibikorwa bye biri gutanga umusaruro. Yavuze ko ari icyizere cyamwongereye imbaraga zo gukomeza gukora cyane no gukabya inzozi ze

Bwiza yavuze ko yiteguye gucana umucyo mu gitaramo cya Summer Country Tour i Bugesera, ashimangira ko imyiteguro yakoze izatuma abafana babona impamvu bamwita umwamikazi

REBA IKIGANIRO BWIZA YAGIRANYE NA INYARWANDA TV