Bwiza yasuye inzu ndangamurage y’aba Vikings babayeho mu kinyejana cya 8 i Burayi

Uyu muhanzikazi wamamaye mu ndirimbo zirimo “Ready”, yasangije abakunzi be amafoto n’amashusho ku mbuga nkoranyambaga amugaragaza ari muri iyi nzu ndangamurage iri i Stockholm, ku wa Gatatu tariki 11 Werurwe 2026.

Bwiza ari muri Suède aho amaze iminsi mike ahakoreye igitaramo ku wa Gatandatu tariki 07 Werurwe 2026, maze ahitamo no gusura bimwe mu bice bikomeye by’amateka n’umuco by’icyo gihugu.

Mu byo yasobanuriwe muri iyi nzu ndangamurage harimo igice cyihariye cyitwa “Ragnfrid’s Saga”, aho uwahasuye yinjira mu rugendo rw’amateka rumara iminota igera kuri 11, rumwereka ubuzima bw’aba Vikings mu buryo bw’amajwi n’amashusho.

Muri uru rugendo, umushyitsi amenya byinshi ku mibereho y’aba Vikings, uburyo bubakaga inzu zabo, ibyo baryaga, uko bagendaga mu nyanja bakoresheje amato yabo azwi cyane, ndetse n’uko bagiraga uruhare rukomeye mu bucuruzi no mu ntambara mu Burayi bwo hambere.

Aba Vikings ni ubwoko bw’abantu bakomokaga mu bihugu byo mu Majyaruguru y’u Burayi bizwi nka Scandinavia, birimo Norvege, Suède na Denmark.

Amateka agaragaza ko aba bantu babayeho cyane hagati y’umwaka wa 800 kugeza mu wa 1050 nyuma ya Yesu Kristo, igihe cyiswe Viking Age mu mateka y’u Burayi.

Aba Vikings bari bazwi cyane nk’abasirikare n’abasare bakomeye. Bari bafite amato yihariye yitwaga Longships yabafashaga kugenda mu nyanja no kugera mu bihugu bya kure. Ibi byatumye bagera mu bice byinshi by’u Burayi ndetse no mu bindi bihugu byo ku migabane itandukanye.

Nubwo bakunze kuvugwa nk’indwanyi zakoraga ibitero mu bihugu bitandukanye, amateka agaragaza ko aba Vikings bari n’abacuruzi bakomeye, abahinzi ndetse n’aborozi.

Bagize uruhare mu kwagura ubucuruzi mu Burayi bwo hambere, ndetse bagera no mu bice by’Ubwongereza, Ubufaransa, Iceland, Greenland ndetse bamwe bavuga ko bageze no muri Amerika mbere y’ivumburwa rya Christopher Columbus.

Inzu ndangamurage ya Viking Museum iri i Stockholm ni imwe mu zigisha amateka y’aba Vikings mu buryo bugezweho.

Mu bintu bikurura abantu bayisura harimo:

Amato ya Vikings (Longships) yubatswe nk’uko yakoreshwaga mu bihe bya kera.

Intwaro n’ibikoresho by’intambara birimo inkota, ingabo n’ingofero bakoreshaga.

Ibikoresho byo mu buzima bwa buri munsi birimo ibyakoreshwaga mu guteka, mu buhinzi no mu bworozi.

Ragnfrid’s Saga, igice cy’ikoranabuhanga cyigisha amateka y’aba Vikings mu buryo bw’inkuru igaragara mu majwi n’amashusho.

Iyi nzu ndangamurage ikunze gusurwa n’abakerarugendo baturutse hirya no hino ku Isi, bashaka kumenya amateka y’aba Vikings bagize uruhare rukomeye mu mateka y’u Burayi.

Ku ruhande rwa Bwiza, gusura iyi nzu byabaye nk’urugendo rwo kumenya amateka n’umuco by’aho ari mu bitaramo, ibintu bikunze gukorwa n’abahanzi benshi mu gihe bagiye mu bindi bihugu.

Nubwo yari mu ruzinduko rw’umuziki, uyu muhanzikazi yahisemo gufata akanya agasura kimwe mu bice bikomeye by’amateka ya Suède, asangira n’abamukurikira kuri internet ibyishimo by’uru rugendo.

Bwiza yasuye Viking Museum i Stockholm mu gihe ari mu ruzinduko rw’ibitaramo ku Mugabane w’u Burayi 

Viking Museum iherereye i Stockholm ni imwe mu nzu ndangamurage zigaragaza amateka y’aba Vikings babayeho mu Majyaruguru y’u Burayi mu kinyejana cya 8 kugeza mu cya 11

Abasura Viking Museum bahabwa urugendo rw’amateka rwitwa “Ragnfrid’s Saga” rubasobanurira ubuzima bw’aba Vikings mu gihe cy’iminota 11

Aba Vikings bari bazwi nk’abasirikare, abasare n’abacuruzi bagendaga mu nyanja bakoresheje amato yabo azwi nka ‘Longships’

Viking Museum ibitse ibikoresho bitandukanye birimo intwaro, ibikoresho byo mu rugo ndetse n’amateka agaragaza imibereho y’aba Vikings