Kuva muri Poland aho Bwiza yagaragaye bwa mbere ku rubyiniro
nyuma yo gusezerana imbere y'amategeko na Uhujimfura Jean Claude, kugera i
Kampala muri Uganda aho The Ben yongeye guhura na Diamond Platnumz, kugeza i
Kigali aho Butera Knowless, Massamba Intore n'andi matsinda y'abahanzi
basusurukije abakunzi b'umuziki, byari ibihe by'umwihariko.
Ni weekend yagaragaje ko umuziki nyarwanda ufite isura
zitandukanye, kuva ku njyana zigezweho kugeza ku muziki gakondo, ndetse n'uko
abahanzi bawo bakomeje kwagura ibikorwa byabo mu karere no ku rwego
mpuzamahanga.
1.Bwiza
yagarutse ku rubyiniro nyuma yo guhindura 'Status'
Umuhanzikazi Bwiza Emerance ari mu bahanzi bagize weekend
idasanzwe, aho yataramiye abakunzi b'umuziki muri Poland.
Iki gitaramo cyari gifite umwihariko wo kuba ari cyo cya
mbere uyu muhanzikazi agaragayemo ku rubyiniro nyuma yo gusezerana imbere
y'amategeko na Uhujimfura Jean Claude, ku wa 23 Ukwakira 2026.
Aba bombi basezeraniye mu Murenge wa Kimihurura mu Karere ka
Gasabo, biyemeza kubana nk'umugabo n'umugore mu buryo bwemewe n'amategeko.
Uhujimfura Jean Claude kandi ni umuntu umaze igihe amufasha mu rugendo rwe
rw'umuziki, aho amuyobora binyuze muri KIKAC Music.
Kuba Bwiza yongeye guhura n'abakunzi be nyuma y'iyi ntambwe
nshya mu buzima bwe bwite byatumye igitaramo cye kigira umwihariko, cyane ko
ari n'igihe abakunzi be bari bamaze iminsi bamugarukaho nyuma y'amakuru
y'ubukwe bwe.
Muri iki gitaramo kandi, Bwiza ntiyari wenyine mu
bahagarariye umuziki nyarwanda. Yafatanyije n'umuhanzi w'injyana gakondo,
Lionel Sentore, na we ufite umwihariko wo kumenyekanisha umuco nyarwanda
binyuze mu bihangano bye.
2.The
Ben na Diamond Platnumz bongeye guhura i Kampala, mu mubano witamuruye
Mu gihe Bwiza yari yerekeje muri Poland, i Kampala muri
Uganda naho hari ibirori bikomeye byahuje bamwe mu bahanzi bafite amazina
akomeye muri Afurika y'Iburasirazuba.
Umuhanzi The Ben yari mu bahanzi batumiwe mu gitaramo cyo
kwizihiza imyaka 10 ya Comedy Store Uganda, igikorwa cyateguwe n'umunyarwenya
Alex Muhangi.
Iki gitaramo cyabaye ku wa Gatanu, tariki ya 30 Ukwakira
2026, kuri Lugogo Cricket Oval, gihuriza hamwe abahanzi n'abanyarwenya
baturutse mu bihugu bitandukanye byo muri Afurika y'Iburasirazuba.
Mu bari bitezwe cyane harimo Diamond Platnumz wo muri
Tanzania na The Ben wo mu Rwanda, bombi basanzwe bafitanye ubucuti ndetse
n'amateka y'imikoranire mu muziki.
Aba bahanzi bongeye gusangira urubyiniro, bibutsa abakunzi
babo indirimbo 'Why' bahuriyemo mu 2022. Ni indirimbo yakunzwe mu karere,
inakomeza kuba imwe mu bihangano by'ingenzi byagaragaje ubushobozi bw'abahanzi
bombi bwo gukorana.
Mbere y'iki gitaramo, The Ben yari yagaragaje ko afata
Diamond Platnumz nk'icyitegererezo mu muziki, avuga ko ari nk'igitabo ahora
asoma kugira ngo agire ibyo amwigiraho.
Yagize ati: "Sinzi niba Diamond Platnumz ahabwa agaciro
akwiriye, kuko kuri twe abahanzi ameze nk'igitabo cy'amasomo. Ni igitabo nsoma
buri munsi kugira ngo ngire ibyo nigiraho kandi mufatireho urugero."
Na Diamond Platnumz yari yagaragaje ko yishimiye kongera
guhura na The Ben, by'umwihariko bakongera kuririmbana indirimbo yabo 'Why'.
Uretse kuba igitaramo cyaranzwe n'umuziki, cyari n'umwanya
wo kwizihiza imyaka 10 Comedy Store imaze itanga urubuga ku banyarwenya
n'abahanzi batandukanye. Cyitabiriwe n'abandi bahanzi barimo Sheebah Karungi,
Rema Namakula, Winnie Nwagi n'abandi.
3.Knowless
yagarutse ku ndirimbo ze zakunzwe mu gitaramo 'Improper Access'**
Mu Rwanda, Butera Knowless na we yari mu bahanzi
bahagurukije abakunzi b'umuziki, abinyujije mu gitaramo 'Improper Access'
cyabereye muri Camp Kigali ku wa Gatandatu, tariki ya 31 Ukwakira 2026.
Uyu muhanzikazi yari yatumiwe nk'umuhanzi mukuru muri iki
gitaramo cyabaye ku nshuro ya gatatu, kigamije guhuza abahanzi, abavanga
imiziki n'abakunzi b'imyidagaduro, by'umwihariko hagamijwe guteza imbere
abagore bafite impano mu muziki.
Knowless yataramiye abari bitabiriye iki gitaramo,
abaririmbira indirimbo zitandukanye zakunzwe mu rugendo rwe rw'umuziki rumaze
imyaka isaga 15.
Yibanze ku bihangano byamufashije kubaka izina mu muziki
nyarwanda, ashimisha abakunzi be bari bamaze igihe bategereje kongera kumubona
ku rubyiniro.
Kimwe mu bihe byihariye byaranze umwanya we ku rubyiniro ni
igihe yaririmbiye Tidiara Kabendera indirimbo yo kumwifuriza isabukuru nziza
y'amavuko, mbere yo gusoza igitaramo cye.
Ntabwo yari wenyine kuko Mamba na we yageze ku rubyiniro,
aririmba indirimbo ze zirimo 'Ku Mutima', mu gihe abandi bahanzi n'abavanga
imiziki barimo DJ Higa, DJ Inkel, DJ Senshi, DJ Novia na DJ Joxy Parker na bo
bagize uruhare mu gususurutsa abari bitabiriye.
Iki gitaramo cyongeye kugaragaza uruhare rw'abagore mu
muziki, cyane ko ari kimwe mu bikorwa byateguwe hagamijwe kubaha urubuga rwo
kugaragaza impano zabo.
4.Massamba
Intore n'Itorero Indashyikirwa bashimangiye ko gakondo igomba kuganza
Nubwo ibitaramo byinshi by'icyo cyumweru byibanze ku njyana
zigezweho, i Kigali habereye igitaramo cyahaye umwanya ukomeye umuziki gakondo.
Ni igitaramo 'Gakondo Iganze' cyabereye muri Kigali Universe
ku wa Gatandatu, tariki ya 31 Ukwakira 2026, cyahuje Massamba Intore, Itorero
Indashyikirwa n'Itorero Inyamibwa.
Iki gitaramo cyari kigamije kugaragaza umwimerere w'umuco
nyarwanda binyuze mu ndirimbo, imbyino n'ibicurangisho gakondo birimo ingoma,
inanga n'umuduri.
Abategura iki gitaramo bagaragaje ko gutumira Massamba
Intore n'Itorero Inyamibwa byari uburyo bwo guha abakunzi b'umuco amahirwe yo
kongera kuryoherwa n'uburyohe bw'umuziki gakondo nyarwanda.
Sam Inkuba, umuvugizi wa Indashyikirwa, yasobanuye ko
bahisemo gukorana na Massamba kubera ubunararibonye afite mu muziki gakondo,
ndetse n'uruhare yagize mu gufasha bamwe mu bahanzi gukura muri uru ruganda.
Ikindi cyaranze iki gitaramo ni ukuninamira umuhanzikazi
w'inararibonye Nyiranyamibwa Suzanne uherutse kwitaba Imana ku wa 16 Ukwakira
2026.
Uyu muhanzikazi yari umwe mu bantu bagize uruhare mu
kubungabunga umuziki gakondo nyarwanda, akaba yaramenyekanye mu bihangano
byibutsa amateka y'u Rwanda, umuco n'ubuzima bw'Abanyarwanda.
Mu bihangano bye byamenyekanye harimo 'Ese Mbaze Nde?',
'Telefone ko Ititaba' n'izindi ndirimbo zakomeje kumwubakira izina mu muziki
nyarwanda.
Urupfu rwe rwashenguye benshi mu bakunzi b'umuziki, abahanzi
n'abandi bafite aho bahuriye n'umuco nyarwanda. Bityo, kumwibuka muri 'Gakondo
Iganze' byari uburyo bwo guha icyubahiro umurage yasize mu muziki.
5.
Riderman na Juno Kizigenza
basusurukije abanya-Rubavu
Mu gihe ibitaramo bitandukanye byari byahuruje abakunzi
b'umuziki mu mpera z'icyumweru, Akarere ka Rubavu na ko kari mu byishimo, aho
Riderman na Juno Kizigenza bahurije imbaraga ku rubyiniro.
Iki gitaramo cyabaye ku wa Gatandatu, tariki ya 31 Ukwakira
2026, nyuma y'umukino wa shampiyona y'icyiciro cya mbere mu mupira w'amaguru
wahuje APR FC na Etincelles FC kuri Stade Umuganda.
Uyu mukino warangiye APR FC itsinze Etincelles FC ibitego
2-0, ariko ibyishimo ntibyagarukiye ku kibuga kuko abakunzi b'umupira n'umuziki
bakomeje kwishimana mu gitaramo cyakurikiyeho.
Riderman na Juno Kizigenza ni bo bari ku isonga mu bahanzi
basusurukije abari aho, bafashijwe na DJ RY wacurangaga indirimbo zitandukanye
hagati y'ibice by'ibitaramo.
Kuba aba bahanzi bombi bari bahuriye ku rubyiniro byari
umwanya mwiza ku bakunzi b'injyana zitandukanye, cyane ko Riderman ari umwe mu
baraperi bamaze igihe kinini bubaka Hip Hop nyarwanda, mu gihe Juno Kizigenza
ari umwe mu bahanzi bakunzwe cyane mu njyana zigezweho.
Riderman na Juno Kizigenza rero bari mu bahanzi bagize
uruhare mu gutuma weekend yo mu Rwanda iba injyanamuntu, aho n'abatuye mu Ntara
bahawe amahirwe yo kwitabira ibitaramo bikomeye bitabereye i Kigali.
6.
Victor Rukotana yataramiye
abakunzi ba Gakondo muri ‘Dutarame u Rwanda’ ku nshuro ya Kane
Umuhanzi Victor Rukotana yari mu bahanzi basusurukije
abakunzi b'umuziki mu mpera z'icyumweru, abinyujije mu gitaramo cye ‘Dutarame u
Rwanda’ cyabereye muri ONOMO Hotel Kigali ku wa Gatanu, tariki ya 30 Ukwakira
2026.
Iki gitaramo cyabaye ku nshuro ya kane, kikaba kiri mu
ruhererekane rw'ibitaramo uyu muhanzi yatangije agamije guha umuziki gakondo
nyarwanda urubuga ruhoraho, kuwugeza ku bantu benshi no kuwukundisha
urubyiruko.
Rukotana yatangije uyu mushinga agamije guhindura imyumvire
y'uko ibitaramo bya gakondo bikwiye kugarukira mu birori by'umuco cyangwa mu
tubari. Yifuza ko na wo wagira ibitaramo byihariye, biteguye neza kandi biha
agaciro abahanzi n'umuco bahagarariye.
Mu kiganiro yagiranye na InyaRwanda mbere, yasobanuye ko
igitekerezo cyo gutangiza ‘Dutarame u Rwanda’ yagitekereje kera, ariko akabura
ahantu hakwiye yahuriza abakunzi b'umuziki we.
Yagize ati: “Sinavuga ko mbitangiye kuko nagiye mbigerageza
mu bihe bitandukanye, gusa nkagongwa no kutabona ahantu hanyaho nahuriza
abakunzi banjye. Nyuma naje kwegera Onomo Hotel ngo mbihakomereze, baranyakira.
Gusa ni umushinga munini, ntabwo ari ho uzagarukira. Nimara kwaguka uzajya no
ahandi.”
‘Dutarame u Rwanda’ ni igikorwa giteganyijwe kujya kiba buri
wa Gatanu wa nyuma wa buri kwezi, kigahuza abakunda umuziki gakondo, abahanzi
n'abandi bifuza gusabana binyuze mu muco nyarwanda.
Uretse gususurutsa abantu, Rukotana afite intego yo
gukoresha ibi bitaramo mu kuzamura impano z'abahanzi bakiri bato, akabaha
amahirwe yo kugaragaza ibyo bashoboye no kumenyekana.
Uyu muhanzi kandi yifuza ko ‘Dutarame u Rwanda’ yaba urubuga
rwo gukundisha urubyiruko umuco warwo, ndetse n'uburyo bwo kumenyekanisha u
Rwanda ku banyamahanga barusura.
Iki gitaramo cyabaye mu gihe Rukotana akomeje gushyira
imbaraga mu muziki gakondo, nyuma yo kumurika Album ye ya mbere yise
‘Imararungu’ mu 2025, igizwe n'indirimbo 10.
Mu bihangano bye byamumenyekanishije harimo ‘Warumagaye’,
‘Munyana’, ‘Inyange’ n'izindi zigaragaza uburyo ahuza injyana gakondo n'uburyo
bugezweho.
Binyuze muri uyu mushinga, Victor Rukotana agaragaza ko
intego ye atari ugukora ibitaramo bisanzwe, ahubwo ari ugufasha umuziki gakondo
kugira urubuga ruhoraho, guteza imbere abawukora no gukomeza gusigasira umurage
nyarwanda.
Ni umwe mu mirongo y'ibikorwa by'umuziki byagaragaje ko
weekend yo ku wa 30 Ukwakira kugeza ku wa 1 Ugushyingo 2026 yari yuzuyemo ibitaramo
bitandukanye, byahaye umwanya injyana zigezweho n'izishingiye ku muco
nyarwanda.
Iyo urebye ibitaramo byabaye muri iyi weekend, usanga byari
bifite umwihariko utandukanye, ariko byose bihurira ku ntego imwe yo
gususurutsa abakunzi b'umuziki no gukomeza guteza imbere imyidagaduro.
Bwiza yagarutse ku rubyiniro afite indi nshingano nshya mu
buzima bwe bwite, The Ben na Diamond Platnumz bongera kwerekana ubucuti bwabo
binyuze mu muziki, Knowless yibutsa abakunzi be ibihangano byamugize uwo ari
we, mu gihe Massamba Intore n'Itorero Indashyikirwa bashimangiye ko umuco
gakondo ukwiye gukomeza guhabwa umwanya.
Ni weekend yagaragaje ko imyidagaduro nyarwanda itari mu
cyiciro kimwe gusa, ahubwo ko ifite imbaraga mu njyana zigezweho, umuziki
gakondo, ibitaramo mpuzamahanga no guha agaciro amateka y'abahanzi bayigizemo
uruhare.
Mu gihe abahanzi bakomeje gushaka uburyo bwo kwegera
abakunzi babo hirya no hino ku Isi, ibitaramo nk'ibi bigaragaza ko umuziki
ukomeje kuba umwe mu miyoboro ihuza abantu, ibihugu n'imico itandukanye.
AMASHUSHO: Umuhanzikazi Bwiza
yataramiye Abanyamuryango ba FPR- Inkotanyi baba kandi bakorera mu Burayi, bari
bateraniye mu mwiherero wabereye muri Poland, kuri uyu wa Gatandatu tariki 31
Ukwakira 2026. Bwiza yaririmbye indirimbo nyinshi zirimo “Ogera” yakoranye na
Bruce Melodie, “Ahazaza” n’izindi. #inyarwandamusic #inyarwanda
🎥:
@MuhirePhilos
AMASHUSHO: Knowless yakiriye ku
rubyiniro Mamba! Umuhanzi akaba na Producer, Mamba yageze ku rubyiniro nyuma yo
kwakirwa na Butera Knowless. Mamba yaririmbye indirimbo nka “Ku mutima”
aherutse gusohora n’izindi. #InyarwandaMusic
https://t.co/sgRg2G7vRp
AMASHUSHO: Itorero Inyamibwa
ryataramiye abitabiriye igitaramo “Gakondo Iganze” cyabereye muri Kigali
Universe mu ijoro ryo kuri uyu wa Gatandatu tariki 31 Ukwakira 2026. Iki
gitaramo ni ngaruka kwezi, gitegurwa n’Itorero Indashyikirwa, hagamijwe gufasha
abantu banyuranye gususurutsa, no kumenya birushijeho umuco nyarwanda.
#InyarwandaMusic
AMASHUSHO: Umunyamabanga Uhoraho
muri Minisiteri ya Siporo, Ngabo Brave, Coach Gael, Umuyobozi wa Watuwave na 1:55
AM, Kenny Mugarura, Sadate Munyakazi n’umugore we, mu bitabiriye igitaramo
“Gakondo Iganze” cy’Itorero Indashyikirwa cyabereye muri Kigali Universe, kuri
uyu wa Gatandatu tariki 31 Ukwakira 2026. #InyarwandaMusic
AMASHUSHO: Juno Kizigenza yataramiye
Abanya-Rubavu nyuma y’umukino wa Etincelles FC na APR FC.
https://t.co/4A8Ho29qqY
AMASHUSHO: Umuhanzi mu njyana
gakondo, Victor Rukotana yataramiye amagana y’abantu binyuze mu gitaramo
ategura yise “Dutarame u Rwanda”, aho amatike yari yashize ku isoko. Ni
igitaramo kibaye ku nshuro ya Kane, hagamijwe gufasha urubyiruko n’abandi
kumenya umuco no kwidagadura. Rukotana yamenyekanye cyane mu ndirimbo nka Warumagaye,
Imararungu, Promise, Umubavu, Romance, Hobe, Inyange, Juru n’izindi.
#inyarwandamusic #inyarwanda
AMASHUSHO: Sheebah Karungi yanyuze
benshi mu gitaramo cy’imbaturamugabo yakoreye i Kampala muri Uganda mu ijoro
ryo ku wa Gatanu, tariki 30 Ukwakira 2026. Iki gitaramo cyahuriyemo abahanzi
barimo The Ben na Diamond Platnumz, cyateguwe mu rwego rwo kwizihiza imyaka 10
ya Comedy Store, kimwe mu bitaramo bikomeye by’urwenya n’imyidagaduro muri
Uganda. #inyarwandanews
AMASHUSHO:
🎯Afite
impano idasanzwe, kandi ndamushima. Ni umuvandimwe. Ni inshuti, kandi dufitanye
indi ndirimbo🎯 Diamond yongeye gushimangira ubushuti bwe
na The Ben, imbere y’ibihumbi by’abafana i Kampala muri Uganda, anateguza indi
ndirimbo bakoranye. #inyarwandamusic
https://t.co/bkQIv5n9WN
AMASHUSHO: The Ben na Diamond
baririmbanye indirimbo ‘Why’ bakoranye, ubwo bataramiraga ibihumbi by’abantu mu
gitaramo gikomeye bakoreye mu Mujyi wa Kampala muri Uganda. Iyi ndirimbo yabaye
intangiriro y’ubushuti bwabo. Yasohotse ku muyoboro wa Youtube, ku wa 4
Mutarama 2022, aho kuri ubu imaze kurebwa inshuro zirenga Miliyoni 30. Diamond
aherutse gutangaza ko, nyuma y’iyi ndirimbo afitanye indi ndirimbo na The Ben
izasohoka mu minsi iri imbere. #InyarwandaMusic
Knowless yataramiye muri Camp Kigali, ateguza igitaramo cye bwite muri BK Arena
The Ben na Diamond bahamije ubushuti bwabo, imbere y'abanya-Uganda
Itorero Inyamibwa ryanyuze benshi mu gitaramo bahuriyemo na Massamba Intore ndetse n'Itorero Indashyikirwa
Rukotana yataramiye abakunzi be binyuze muri 'Dutarame u Rwanda'
The Ben yongeye gutaramira mu Mujyi wa Kampala mu gihugu cya Uganda binyuze muri 'Comedy Store'