Bwiza yabaye ‘Marraine’ wa Nyambo mu gusezerana imbere y’amategeko - AMAFOTO +VIDEO

Uyu muhango wabereye mu Murenge wa Nyarugenge mu Mujyi wa Kigali, witabirwa n’imiryango y’impande zombi ndetse n’inshuti za hafi zari zatoranyijwe, mu rwego rwo kuwugira uw’ibanga kandi uha umwanya ibyishimo by’abari bahari.

Kimwe mu byagarutsweho cyane muri uyu muhango ni uko umuhanzikazi Emerance Bwiza wamamaye nka Bwiza ari we wabaye ‘Marraine’ wa Miss Nyambo, amuherekeza muri iki gikorwa gikomeye, mu gihe Uwiragiye Richard yari aherekejwe na ‘Parrain’ we.

Si ubwa mbere Bwiza agaragaza ubucuti bukomeye afitanye na Miss Nyambo. Mu bihe bitandukanye bombi bakunze kugaragara bari kumwe, haba mu bikorwa bisanzwe ndetse no mu birori bikomeye.

Baherukaga no kubonana i Dubai muri Leta Zunze Ubumwe z’Abarabu, aho bari bitabiriye ibirori byo kwambika impeta mugenzi wabo Tessy, wasezeranye n’umuraperi Shizzo.

Ubwo aheruka kuganira na InyaRwanda, Bwiza yari yareruye agaragaza uburyo afata Miss Nyambo nk’umuntu wa hafi cyane. Yagize ati: "Ni njye ‘Marraine’ wa Nyambo. Umukobwa wanjye."

Aya magambo yongeye kugira ubusobanuro bukomeye kuri uyu munsi, ubwo yamuhagararaga iruhande mu gusezerana imbere y’amategeko.

Uyu muhango kandi witabiriwe n’ibyamamare bitandukanye birimo Killaman, Dr Nsabi, Mama Niyori, Mitsutsu, Clapton Kibonge, Patrick Rusine n’umugore we Iryn, ndetse n’abandi bari baje gushyigikira aba bageni.

Uyu munsi w’amateka ukurikiye ibindi bikorwa byabanje mu rugendo rw’aba bombi. Tariki 25 Nyakanga 2026, Uwiragiye Richard yari yambitse Miss Nyambo impeta y’urukundo mu birori byabereye mu ibanga rikomeye, mbere y’uko hakurikiraho umuhango wo gufata irembo wabereye mu Karere ka Kirehe, aho Miss Nyambo akomoka.

Urukundo rw’aba bombi rumaze imyaka ibiri rukura buhoro buhoro, kugeza igihe bafashe icyemezo cyo kurushyira ku rundi rwego rwubakiye ku isezerano ryo kubana nk’umugabo n’umugore.

Mu kiganiro yagiranye na Chita Magic nyuma yo kwambikwa impeta, Miss Nyambo ntiyahishe ibyishimo yari afite, avuga ko ubuzima bwe bwafashe indi ntera.

Yagize ati "Ubu ngubu ndi 'Fiancée' w'umuntu. Nta kintu cyiza nko kuba 'Fiancée' w'umuntu ukunda, wujuje ibintu wasengeye ku mugabo."

Yavuze ko ijoro yambikiwemo impeta rizahora rimwibutsa ibyishimo bidasanzwe yagize.

Ati: "Ryari ryiza cyane. Umugabo wanjye ntabwo aziranyi n'abantu benshi, abaje na bo ni abo yari asanzwe afitiye nimero banavugana."

Nubwo kugeza ubu bataratangaza itariki nyayo y’ubukwe, Miss Nyambo yavuze ko imyiteguro yamaze gutangira kandi ko igihe nikigera azatumira inshuti n’abakunzi be.

Yagize ati: "Hakurikiyeho ubukwe mu gihe ntazi, nzabatumira nimara kubimenya. Mfite amatsiko y'umwana wanjye nzabyara, igihe ntazi nzamubyara. Uriya ni we uzambera umugabo rwose."

Yanagaragaje ko atewe amatsiko n’ubuzima bushya agiye gutangira, burimo kubaka urugo, kubana n’umugabo we no kuzarera abana.

Miss Nyambo yasobanuye kandi impamvu abantu benshi basanzwe ari inshuti ze batagaragaye muri ibi birori, avuga ko byateguwe mu buryo bw’ibanga, hagatumirwa abantu bake cyane bo mu miryango n’inshuti za hafi.

Mu gihe ubuzima bwe bwite bukomeje kwinjira mu kindi cyiciro, na none akomeje kwitwara neza muri sinema nyarwanda. Muri iyi minsi ari mu bakinnyi b’imena muri filime Mwenedata, anagaragara muri Amaraso Yanjye ya Killaman, ndetse no mu yindi mishinga ikomeje gukurikirwa n’abakunzi ba sinema.

Kuba Bwiza yamubereye Marraine muri uyu muhango na byo byabaye ikimenyetso cy’ubucuti bwimbitse bumaze igihe hagati yabo, mu gihe Miss Nyambo na Uwiragiye Richard bo bakomeje urugendo ruganisha ku bukwe, nyuma yo guhamya urukundo rwabo imbere y’amategeko.

Uwiragiye Richard usanzwe ubarizwa muri Australia yemeranyije na Miss Nyambo kubana nk'umugabo n'umugore byemewe n'amategeko

Umuhanzikazi Bwiza yabaye 'Marraine' wa Miss Nyambo, bahamya urugendo rw'ubushuti rwabo bubatse igihe kinini

Kari akazi katoroshye ku bijyanye no gufata amafoto Miss Nyambo bitewe n'uko umutekano wari wakajijwe mu buryo bukomeye

Umunyarwenya akaba n'umukinnyi wa filime wamamaye nka 'Mitsutsu'

Umunyamakuru akaba n'umushyushyarugamba, Julius William Muhire washinze Chitta Magic

Muhoza Ange, umugore we Junior Giti uzwi mu basobanura filime mu Rwanda yashyigikiye Miss Nyambo ku munsi we

Rugemana Amen Babu washinze Umuyoboro wa 'RUA Rwanda' yashyigikiye Miss Nyambo n'umukunzi we ku munsi wabo

Umuhangamideli Maurice Niyigena washinze 'Matheo Design' yashyigikiye intambwe yatewe na Miss Nyambo

Nyambo n'umugabo we bagendeye mu modoka iri mu zihagazeho ku isoko muri iki gihe. Itunga umugabo igasiba undi

Miss Nyambo yagendeye mu modoka yo mu bwoko bwa 'Cadillac Escalade' ihageze Miliyoni 176 Frw ku isoko

Clapton Kibonge, 'Umukonyine', Patrick Rusine n'umugore we mu birori bya Miss Nyambo n'umukunzi we

Umunyamakuru akaba n'umunyarwenya, Rusine Patrick ari kumwe n'umugore we Iryn

Byari ibyishimo kuri Miss Nyambo n'umukunzi we nyuma yo gusezerana imbere y'amategeko ya Repubulika y'u Rwanda

Umukinnyi wa filime wamamaye nka Clapton Kibonge ubwo yari ku biro by'Umurenge wa Nyarugenge

Abarimo Rufonsina, Moustapha, Mitsutsu n'abandi bashyigikiye Nyambo n'umukunzi we

Umukinnyi wa filime wamamaye nka Killaman ubwo yari ku Murenge wa Nyarugenge ashyigikiye Nyambo n'umukunzi we

Mama Niyori yashyigikiye Miss Nyambo nk'umuntu wamuciriye inzira yo kwinjira muri Cinema

Umukinnyi wa filime wamamaye nka Dr Nsabi muri filime nyarwanda zitandukanye

Umukinnyi wa filime wamamaye nka Nick Karenzi [Ubanza ibumoso] ubwo yageraga ku Murenge wa Nyarugenge

Umukinnyi wa filime wamamaye nka 'Mama Niyori' ari mu baherekeje Nyambo n'umukunzi we basezerana imbere y'amategeko

Umukinnyi wa filime wamamaye nka 'Rufonsina' ari kumwe na Dr Nsabi bahuriye muri filime zitandukanye zamamaye

REBA HANO INDAHIRO YA MISS NYAMBO N'UMUKUNZI WE IMBERE Y'AMATEGEKO

REBA HANO UBWO NYAMBO YAGERAGA KU MURENGE WA NYARUGENGE

Kanda hano ubashe kureba amafoto yaranze umuhango wo gusezerana imbere y'amategeko

AMAFOTO: Yak- Nations Images