Kuri iki Cyumweru tariki ya 10 Gicurasi 2026 saa Tatu z’ijoro kuri Spotify Camp Nou ni bwo FC Barcelona yari yakiriye Real Madrid mu mukino wo ku munsi wa 35 wa shampiyona ya 2025/2026. FC Barcelona yasabwaga kunganya cyangwa gutsinda uyu mukino ikegukana igikombe cya 29 cya shampiyona.
Iyi kipe yari imbere y’abafana bayo yinjiye mbere mu mukino mbere ya Real Madrid, ku munota wa 9 gusa ibona kufura yinjizwa mu izamu neza na Marcus Rashford, igitego cya mbere kiba kirabonetse. Bidatinze ku munota wa 18, FC Barcelona yabonye igitego cya kabiri gitsinzwe na Ferran Torres ku mupira mwiza yahawe na Dani Olmo.
Nyuma y’uko Real Madrid itsinzwe ibi bitego byo mu minota ya mbere yagiye ibona uburyo bwari kuvamo ibitego nk'aho Gonzalo Garcia yari asigaranye n’izamu ariko ateye umupira unyura ku ruhande.
Igice cya mbere cyarangiye FC Barcelona iyoboye n’ibitego 2-0. Mu gice cya kabiri umukino waje udafite ingufu nyinshi cyane mu bijyanye no gusatira ahubwo abakinnyi bo ku mpande zombi bagashyamirana.
Ku munota wa 64, Vinicius yari abonye igitego ariko umunyezamu wa FC Barcelona aratabara. Real Madrid yakomeje kubona uburyo gusa kwinjiza igitego mu izamu rya FC Barcelona biranga.
Umukino warangiye FC Barcelona itsinze Real Madrid ibitego 2-0 ihita yegukana igikombe cya shampiyona cya 2025/2026. Ni igikombe cya 29 yegukanye mu mateka bikaba ari ubwa mbere igitwaye bisabye ko itsinda Real Madrid kuri El Clasico.
Marcus Rashford yishimira igitego yatsinze
Bwa mbere mu mateka FC Barcelona yatwariye igikombe cya shampiyona kuri Real Madrid