Mu kiganiro na InyaRwanda, Ishimwe Karake Clement, umwe mu
bafatanyije na Knowless muri uyu mushinga, yavuze ko iyi ndirimbo yakozwe mu
gihe gito cyane.
Yagize ati: “Iyi ndirimbo mu buryo bw’amajwi (Audio) yakozwe
na Producer Mamba. Nyuma bayikorera mu Mujyi wa Dar es Salaam, habura gato ngo
amatora abe, hanyuma arangira Samia Suluhu abaye Perezida.”
Amatora ya Perezida wa Tanzania yabaye tariki 29 Ukwakira
2025, aho Samia Suluhu Hassan yatorewe amajwi hafi miliyoni 31,9, angana na
97,66% y’amajwi yose.
Ibyavuye mu matora byatangajwe n’Umuyobozi wa Komisiyo
y’Amatora, Jacobs Mwambegele, wavuze ko ayo matora yitabiriwe ku kigero cya
hafi 87% by’abaturage bagera kuri miliyoni 37,6 bari biyandikishije gutora.
Ishyaka riri ku butegetsi, Chama Cha Mapinduzi (CCM), rimaze imyaka igera kuri
50 riyoboye igihugu.
Butera Knowless yavuze ko iyi ndirimbo yayirangije mu ijoro
rimwe gusa, mbere y’uko Ishimwe Karake Clement ayinoza neza mu bijyanye na Mix
& Mastering.
Nyuma yo gukora amajwi, Knowless yagiye kumenya uko amashusho
yakorwa, abifashijwemo na Meddy Saleh, maze amashusho akorerwa muri Dar es
Salaam.
Mu gikorwa cyo gushyira indirimbo ku mugaragaro, Knowless
yashyize ahagaragara n’abakoze kuri uyu mushinga: Producer: Mamba; Director:
Meddy Saleh, Assistant Video Director: Nick Rusule, Mix & Mastering:
Ishimwe Karake Clement, Guitars: Jules Hirwa, na Gear: Ituze Film Production
Indirimbo “Ntacyo” yamaze kujya kuri YouTube, aho abakunzi ba
Butera Knowless bakomeje kuyakira neza, bayishimira umwimerere n’ubutumwa
buyirimo.
Butera Knowless ni umwe mu bahanzi b’icyamamare mu Rwanda,
umaze imyaka igera ku 16 mu muziki w’u Rwanda kuva yatangira mu 2009. Urugendo
rwe rwaranzwe n’ibintu byinshi by’ingenzi byamugize icyamamare, harimo:
Mu rugendo rwe, yakoze indirimbo nyinshi n’abatunganya umuziki
bo mu Rwanda ndetse no mu mahanga, byatumye ubuziranenge bw’ibihangano bye
buzamuka kandi bukundwa n’abatari bake.
Butera Knowless yitabiriye ibitaramo byinshi bikomeye mu
Rwanda no hanze yarwo, harimo ibitaramo byateguwe n’ibigo bikomeye, amarushanwa
yo mu rwego mpuzamahanga ndetse n’ibitaramo byahuriraga abahanzi bakomeye
b’abanyamahanga.
Indirimbo ze akenshi ziba zirimo ubutumwa bufasha urubyiruko,
cyane cyane mu bijyanye n’urukundo, kwiyubaka no guharanira intego mu buzima.
Knowless yagiye agaragara mu bikorwa byo gufasha abandi,
harimo gushyigikira ibikorwa by’abana batishoboye, ibikorwa by’uburezi, ndetse
no gukangurira urubyiruko gukunda umuco no kurushaho kuwumenya.
Yegukanye ibihembo byinshi by’icyubahiro mu Rwanda n’ahandi,
birimo ibihembo by’umuhanzikazi w’umwaka, ndetse niwe mugore wa mbere watwaye
irushanwa rya Primus Guma Guma Super Stars.
Mu rugendo rwe, yagiye akorana n’abahanzi n’abatunganya
umuziki b’icyubahiro mu Rwanda ndetse no hanze yarwo, harimo nko gufatanya na
Meddy Saleh, Ishimwe Karake Clement, na benshi mu bafite ubuhanga mu gutunganya
amashusho n’amajwi.
Knowless ntiyigeze asubira inyuma; buri gihe yagiye atanga
indirimbo nshya, amashusho meza, ndetse n’ubutumwa bushya mu muziki we,
bigatuma akomeza kuba ku isonga mu bahanzi bakomeye mu Rwanda.
Mu ncamake, urugendo rwa Butera Knowless kuva 2009–2025
rwagiye rugaragaza guhanga udushya, guharanira ubuziranenge, guhanga indirimbo
zifite ubutumwa, kwitabira ibitaramo bikomeye, no gukundwa n’abakunzi b’umuziki
mu Rwanda no hanze yarwo.
Butera Knowless yasohoye “Ntacyo”, indirimbo yakorewe muri
Dar es Salaam mbere y’amatora ya Samia Suluhu
KANDA HANO UREBE AMASHUSHO Y’INDIRIMBO ‘NTACYO’ YA BUTERAKNOWLESS