Kuri uyu wa 7 Kanama 2026, ni
bwo Clement na Knowless bujuje imyaka 10 bakoze ubukwe, urugendo rwabahuje
nk'abakundana, rukababyarira urugo rwuzuye ibyishimo ndetse n'abana batatu.
Mu kwizihiza uyu munsi
w'amateka mu buzima bwabo, Clement yanyujije ubutumwa bwuje amarangamutima ku
rubuga rwa Instagram, agaragaza ko imyaka icumi ishize kuva bavuze bati
"Yego" atigeze yicuza icyemezo yafashe cyo guhitamo Knowless
nk'umugore we.
Yagize ati: "Hashize imyaka icumi tuvuga tuti 'Yego', tutazi ibyo ubuzima bwari buduteganyirije. Nyuma y'iyi myaka yose, mvugishije ukuri, guhitamo wowe ni cyo cyemezo cyiza kurusha ibindi nafashe mu buzima bwanjye.
Ntabwo byahoraga byoroshye. Twagize
ibihe byiza n'ibigoye, ibitwenge n'amarira. Ariko muri buri gihe cyose
twanyuzemo, urukundo rwacu rwakomeje kuba rukomeye kurusha imbogamizi zose
twahuye na zo."
Yakomeje ashimira umugore we
uburyo yakomeje kumuhagararaho no kwizera urugo rwabo, ndetse avuga ko bishimira
ubuzima bwiza bubakiye ku rwibutso rwiza bazahora bazirikana.
Yagize ati: "Urakoze kuba warabaye hafi yanjye, ukatwizera kandi ugakomeza kunkunda no mu minsi ntari meze neza. Twubatse ubuzima bwiza buzahora ari urwibutso rw'agaciro kuri twe.
Imyaka 10 irarangiye, ariko urugendo ruracyakomeje. Witegure mukunzi,
intego ni imyaka 100. Isabukuru nziza y'imyaka 10 y'ubukwe bwacu. Ndagukunda
kurushaho uko umunsi ushira. Kugeza ku kwezi, tukagaruka, ndetse
tukarenzaho."
Aya magambo yakiriwe neza
n'abakurikira aba bombi, benshi bagaragaza ko urukundo rwabo rwabaye urugero
rwiza rw'ingo zubakiye ku kwizerana, kwihangana no gushyigikirana.
Inkuru y'urukundo rwa Butera
Knowless na Ishimwe Clement ntabwo yatangiriye ku munsi w'ubukwe. Yabanje
kubakwa n'ubufatanye mu muziki.
Clement ni umwe mu bashinze
Kina Music, inzu yafashije kuzamura impano ya Butera Knowless kugeza abaye umwe
mu bahanzikazi bafite amateka akomeye mu Rwanda. Uko bakoranaga ni ko umubano
wabo waje gukomera, nyuma uza kuvamo urukundo rwatumye bafata icyemezo cyo
kubana nk'umugabo n'umugore.
Tariki ya 7 Kanama 2016 ni
bwo basezeranye imbere y'amategeko n'Imana, ubukwe bwabo bubera mu busitani bwa
Golden Tulip Hotel i Nyamata, bwitabirwa n'inshuti, imiryango ndetse n'abantu
batandukanye bo mu ruganda rw'imyidagaduro.
Icyo gihe ubukwe bwabo
bwavuzwe cyane, kubera ko bwahuje umwe mu ba Producer bakomeye mu Rwanda
n'umuhanzikazi wari umaze imyaka myinshi ari ku isonga mu muziki nyarwanda.
Imyaka 10 yubatse urugo n'umuryango
Mu myaka icumi ishize,
Clement na Knowless ntibubatse gusa amazina yabo mu muziki, ahubwo banubatse
umuryango.
Bafitanye abana batatu barimo
Ishimwe Or Butera wavutse mu 2016, Ishimwe Inzora Butera wavutse mu 2020 ndetse
n'umuhungu wabo wa gatatu wavutse tariki ya 3 Werurwe 2023.
Nubwo bombi bafite inshingano
nyinshi mu ruganda rw'umuziki, bakunze kugaragaza ko umuryango uza imbere, ari
na byo bituma abakunzi babo babafata nk'urugero rw'abashakanye bashoboye guhuza
ubuzima bw'umwuga n'ubw'urugo.
Imyaka icumi ni intambwe
ikomeye ku bashakanye benshi, ariko ku muryango wa Clement na Knowless yabaye
umwanya wo kongera guhamya isezerano ry'urukundo no kwibutsa ko kubaka urugo
bisaba urukundo, ukwizerana, kwihangana no guhora muhagaze hamwe mu bihe byose.
Mu magambo ye, Clement
yerekanye ko nyuma y'iyo myaka yose, nta cyahindutse ku cyemezo yafashe mu
2016, ahubwo urukundo akunda umugore we rwiyongereye uko imyaka yagiye ishira.
Mu gihe bizihiza imyaka 10
babana nk'umugabo n'umugore, ubutumwa bwabo bukomeje kubera benshi isomo ry'uko
urukundo rutubakwa n'umunsi umwe, ahubwo rwubakwa n'ibyemezo bifatwa buri
munsi, no gukomezanya mu bihe byiza n'ibigoye.
Ishimwe Clement na Butera Knowless barizihiza imyaka 10 ishize barushinze nk’umugabo n’umugore
Ishimwe Clement yavuze ko guhitamo Knowless ari kimwe mu byemezo byiza yafashe mu buzima bwe
Ishimwe yavuze ko we na
Butera Knowless banyuze muri byinshi ariko bakomeza gukomera mu rugendo rwo
kubaka umuryango uhamye
Mu myaka 10 ishzie babana nk'umugabo n'umugore, Ishimwe na Butera baguye umuryango, aho ubu bafite abana batatu