Indirimbo Dai Dai, Burna Boy yakoranye n'icyamamare cyo muri Colombia, Shakira, ni indirimbo y'Igikombe cy'Isi cya FIFA 2026. Iyi ndirimbo yageze ku mwanya wa mbere ku rutonde rwa Spotify Global Top Songs.
Agahigo Burna Boy afite ubu kari kasanzwe gafitwe n'umuhanzikazi w'Umunya-Afurika y'Epfo, Tyla, wari wageze ku bamwumva buri kwezi bagera kuri miliyoni 46.58 mu Ukuboza 2025, icyo gihe akaba yarabaye umuhanzi wo muri Afurika wari ufite umubare munini w'abamwumva kuri Spotify.
Indirimbo Dai Dai, yasohotse ku wa 15 Gicurasi nk'indirimbo yemewe y'Igikombe cy'Isi cya FIFA 2026, imaze gukusanya abarenga miliyoni 123 bayumvise kuri Spotify kuva yasohoka.
Iyi ndirimbo yanditswe mu ndimi eshanu zirimo Icyongereza, Icyesipanyoli, Igitaliyani, Igifaransa n'Ikijapani. Yahuje uburyo Shakira asanzwe akoramo muri Pop n'umuziki wa Afrobeats wa Burna Boy, ndetse yandikwa ku bufatanye n'abahanzi n'abanditsi b'indirimbo barimo Ed Sheeran na Jon Bellion.
Shakira na Burna Boy banayiririmbye mu birori byo gufungura Igikombe cy'Isi ku wa 11 Kamena.
Amashusho y'iyi ndirimbo atangirana n'abakinnyi b'ibyamamare mu mupira w'amaguru barimo Lionel Messi, Kylian Mbappé na Erling Haaland, ibintu byakomeje kuyifasha kugera ku bantu benshi.
Mu gihe Igikombe cy'Isi cya FIFA 2026 kizakomeza kugeza ku wa 19 Nyakanga, umukino wa nyuma ukazabera kuri Stade ya MetLife i New Jersey, biteganyijwe ko Dai Dai izakomeza kumvwa cyane, ibintu bishobora gutuma umubare w'abayumva kuri Spotify ukomeza kwiyongera.
Dai Dai, indirimbo yahurije hamwe Burna Boy na Shakira