Uyu mukino uzahuza Pittsburgh Steelers na New Orleans Saints, ukazabera kuri Stade de France saa 14:30 i Paris.
Burna Boy azaba ari we uyoboye igitaramo kizaba hagati mu mukino, mu birori bizaba ari amateka kuko ari bwo bwa mbere umukino wa shampiyona isanzwe ya NFL uzakinirwa ku butaka bw’u Bufaransa.
Uyu muhanzi w’Umunyanijeriya uri mu bafite izina rikomeye mu muziki wa Afurika ku rwego mpuzamahanga, azwiho guteza imbere injyana ya Afro-fusion, akaba amaze gutaramira ahantu henshi hakomeye hirya no hino ku Isi.
Burna Boy yagiye ahagararira umuziki wa Afurika mu bikorwa bikomeye, aho amaze gutorwa inshuro 13 muri GRAMMY Awards. Ni na we muhanzi wa mbere ukomoka muri Afurika waririmbye mu gitaramo nyirizina cya GRAMMY Awards.
Muri Mata 2025, Burna Boy yabaye umuhanzi wa mbere w’Umunyafurika wakoze igitaramo nyamukuru kuri Stade de France.
Burna Boy yavuze ko kuba agiye kongera gusubira kuri Stade de France bifite igisobanuro gikomeye kuri we, nyuma y’ijoro avuga ko ryari rimwe mu yaranzwe n’ibihe bikomeye mu rugendo rwe rwa muzika.
Ati: “Paris yampaye rimwe mu majoro akomeye mu buzima bwanjye muri muzika, kandi kongera gusubira kuri Stade de France ku bw’ibi birori bisobanuye byinshi kuri njye. NFL igiye kuzana mu Bufaransa ikintu kitigeze kibaho mbere, kandi nishimiye guhagararira umuziki wa Afurika. Nzaha abantu igitaramo batazibagirwa.”
Tim Tubito, ushinzwe ibikorwa byo kwidagadura, umuziki n’imyidagaduro muri NFL ku rwego mpuzamahanga, yavuze ko Burna Boy ariwe muhanzi ukwiye gutaramira muri uyu mukino w’amateka.
Uyu mukino wa NFL Paris Game uzaba utegurwa ku bufatanye na GL Events ndetse ubifashijwemo na Minisiteri y’Imikino y’u Bufaransa.
Igitaramo cya Burna Boy kizanyuzwa imbonankubone kandi ku buntu mu Bufaransa kuri France Télévisions na beIN Sports, mu gihe L’Équipe izanyuza umukino nyuma yaho kuri uwo mugoroba.
Burna Boy azafatanya n'abandi bahanzi bamaze gutangazwa ko bazataramira muri gahunda za NFL International Games 2026, barimo Jonas Brothers muri Melbourne, Pedro Sampaio na Ricky Martin i Rio de Janeiro, Ayra Starr i London, Cage The Elephant i Munich ndetse na The Warning i Mexico City.
NFL yatangaje ko umwaka wa 2026 uzaba uw’amateka kuko izakina imikino mpuzamahanga myinshi kurusha indi myaka yose, aho imikino izabera mu bihugu birindwi no ku migabane.
Uyu mukino uzaba ari uwa mbere wa NFL wa shampiyona isanzwe uzabera mu Bufaransa.
Burna Boy agiye gutaramira muri NFL i Paris