Yavuze ko buri gihe iyo agize umukunzi bikagera aho amumenyekanisha mu muryango we, ibintu bihita bihinduka kuko umuryango w'uwo musore umwanga cyangwa ukanga ko bakomezanya.
Nk'uko tubikesha urubuga Volta Stand Up, mbutumwa bwe bwuzuyemo amarangamutima, yavuze ko atumva impamvu nyakuri ituma ibi bikomeza kumubaho inshuro nyinshi.
Yagaragaje ko yigeze kwibaza niba hari ikibazo afite atabona cyangwa niba hari ikintu cyihariye abantu babona kuri we nyamara we atacyumva. Ati: "Ntekereza ko ndi mwiza kandi mfite imyitwarire myiza. Nifuza kuba umuntu w'inzozi z'undi ubuzima bwe bwose, ariko buri gihe birangira bidashobotse. Sinzi impamvu."
Aya magambo yagaragaje uburemere bw'agahinda afite nyuma yo kubona umubano yatangiranye icyizere ukomeza guhura n'imbogamizi igihe ugeze ku rwego rwo kumenyana n'umuryango w'umukunziwe.
Yavuze ko buri nshuro abonye umusore amukunda kandi ibintu bigenda neza, yibwira ko amaherezo yabonye umuntu bazabana, ariko akaza gutungurwa no kubona umuryango w'uwo musore utamwishimiye.
Inkuru ye yahise ikurura amaso ya benshi ndetse batanga ibitekerezo byinshi ku mbuga nkoranyambaga, aho bamwe bamuhumurije bamubwira ko atagomba kwiheba cyangwa kumva ko nta gaciro afite.
Bamwibukije ko rimwe na rimwe ikibazo gishobora kutaba kiri ku muntu ahubwo kikaba kiri ku muryango runaka cyangwa ku mitekerereze y'abawugize.
Abandi bagaragaje ko hari igihe ibintu nk'imiterere y'umuco, imyemerere, inkomoko y'umuntu cyangwa uko yiyerekana mu maso y'abantu bishobora kugira uruhare mu buryo bamwe bamwakira.
Hari kandi abavuze ko rimwe na rimwe ikibazo gishobora guterwa n'umusore ubwe, cyane cyane iyo adafite ubushobozi bwo guhagarara ku cyemezo cye cyangwa ngo asobanurire umuryango impamvu yahisemo uwo mukobwa.
N'ubwo uyu mukobwa atigeze atangaza impamvu yemeza ko ari yo ituma yangwa, bamwe mu bakoresha imbuga nkoranyambaga bavuze ko adakwiye gukomeza kwishinja amakosa cyangwa kwibona nabi kubera ibitekerezo by'abandi.
Bamugiriye inama yo gukomeza kwizera ko azahura n'umuntu uzamukunda uko ari, ndetse n'umuryango we ukamwakira nta mananiza.
Abasesenguzi b'imibanire y'abakundana bavuga ko kwakirwa cyangwa kutakirwa n'umuryango w'umukunzi bishobora guterwa n'impamvu nyinshi zitandukanye, kandi ko bidakwiye gupimirwa gusa ku isura cyangwa ku miterere y'inyuma y'umuntu.
Bemeza ko urukundo nyarwo rushingira ku kumvikana, kubahana no gushyigikirana hagati y'abakundana, aho buri ruhande rugomba kugira uruhare mu kubaka icyizere hagati y'umuryango n'uwo bakundana.