Bull Dogg, Yosh-B wo muri RDC na Logan Joe mu bategerejwe mu gitaramo ‘Mic Tribe’ cyatewe inkunga na Skol

Iki gitaramo kizabera kuri Mundi Center tariki ya 07 Gashyantare 2026, gifite umwihariko wo guhuza abakunzi b’iyi njyana n’abaraperi, kikabaha umwanya wo gususuruka, kwishimira amajwi nyakuri, ndetse no kugaragaza impano zabo ku rubyiniro.

Ni amahirwe adasanzwe yo kwiyumvira hip-hop mu buryo bwimbitse, aho buri muhanzi azatanga ibihangano bye mu buryo butaziguye kandi bujyanye n’imbaraga z’umuziki.

Umwaka ushize wa 2025, Mic Tribe yasize ibihe by’urwibutso ubwo abahanzi b’amazina akomeye nka Bull Dogg, Bushali, Logan Joe, Kenny K-Shot, Angell Mutoni na Trizzie Ninety Six bari ku rubyiniro, bituma iki gitaramo kiba kimwe mu byaranze injyana ya hip-hop mu Rwanda.

Abafana bazabasha kwishimira ibihangano bya YOSH-B Bahati, Bull Dogg, B-Threy, Logan Joe, Pro Zed na Fifi Raya, bose bazaba bari ku rubyiniro mu ijoro rizaba ryuzuyemo injyana, imbyino n’imyidagaduro idasanzwe.

Uretse imiziki, abitabira bazanabona amahirwe yo kwishimira ibikorwa by’ubugeni n’ubuhanzi bwo ku muhanda (street art), bituma Mic Tribe iba igitaramo kitari gusa umuziki, ahubwo n’umwanya wo gusabana no kugaragaza impano zitandukanye z’abanyarwanda.

Iki gitaramo cyatewe inkunga n’ibigo bikomeye birimo Skol na Airtel, kikaba cyateguwe mu rwego rwo guteza imbere hip-hop nyarwanda no guha abafana n’abaraperi umwanya wo guhurira mu ijoro rimwe ryuzuyemo injyana n’imbaraga z’umuziki.

Abashaka kubona amatike bashobora kuyagura kuri Mundi.rw cyangwa bakurikize amabwiriza ya USSD: *669*712#.

Mic Tribe si igitaramo gisanzwe. Ni ijoro ry’abakunzi ba hip-hop n’abaraperi, aho bazahurira, bagasabana, bakishimira umuziki nyarwanda, ndetse banasobanukirwe n’ubugeni bwo ku muhanda butandukanye.

Bull Dogg, umuraperi w’icyamamare, witezweho imbaraga zidasanzwe n’amajwi akora ku mitima y’abakunzi ba Hip Hop. Ni umwanya wo kwumva impano ye mu buryo bwuzuye kandi bwimbitse

B-Threy, azagaragaza ubuhanga bwe mu ndirimbo ziganisha ku buzima bwa buri munsi, yitezweho guhuza abafana n’umudiho we wihariye n’akanyamuneza ke ku rubyiniro

Logan Joe, uyu muhanzi azatanga ibihangano bye by’umwimerere, yerekana impano ye mu njyana ya Hip Hop ifite umwihariko wihariye mu Rwanda. Muri iki gihe agezweho binyuze mu ndirimbo nka ‘Treasure’

YOSH-B Bahati wo mu Mujyi wa Goma agiye gutaramira i Kigali ku nshuro ye ya mbere

Umuraperi Pro Zed, azagaragaza ubuhanga bwe mu gutegura no kugaragaza amajwi y’indirimbo zishimisha abakunzi ba hip-hop, bituma ijoro rizaba riryoherwa n’abitabiriye

Fifi Raya, umuraperikazi wigaragaje kuva mu myaka itatu ishize ategerejwe muri iki gitaramo kizabera kuri Mundi Center, ku wa 7 Gashyantare 2026