Nyuma yo kuyobora amasengesho n’ibitaramo mpuzamahanga mu bihugu birimo Leta Zunze Ubumwe za Amerika, Zimbabwe, Kenya, Uganda, na Zambia, Bryan yagarutse mu Rwanda akora umuziki wihariye, utanga ubutumwa bw’ubuhanuzi kandi uhuza umwimerere w’Afurika n’ubuhanga mpuzamahanga.
Indirimbo “Asante”, bisobanura ngo “Urakoze” mu rurimi rwa Kiswahili, ni indirimbo ikomeye y’ishimwe, yibanda ku gushimira Imana ku buzima, ubuntu, uburinzi, amahoro, n’ibyiza itanga.
Iyi ndirimbo igaragaramo ibikoresho by’umwimerere by’Afurika, imiziki ya djembe, hamwe n’ijwi risobanutse rya Bryan Lead. Bolingo ni we wacuranze gitari ya acoustic, Brilliance ayobora amashusho, naho Jimmy Pro na Flexmusic bafatanya na Bryan mu gukora iyi ndirimbo mu buryo bw'amajwi.
Bryan Lead yabwiye inyaRwanda ko “Hari impamvu nyinshi zo gushimira Imana — ku buzima, ubuntu, uburinzi, amahoro, ndetse n’iminota mishya yose. Iyi ndirimbo ni uburyo bwanjye bwihariye bwo kugaragaza ishimwe no gusenga.”
Ni indirimbo yakoranye na Gaby Kamanzi ubu uri muri Ghana muri gahunda z'ivugabutumwa, ikaba ihuriza hamwe amajwi abiri akomeye mu muziki wa Gospel mu Rwanda, itanga ubutumwa buhoraho bw’icyizere n’ishimwe, butazimiza imico, indimi, cyangwa imbibi.
Dr. Lauren Mitchell wo muri Worship Central USA yavuze ko Bryan Lead ari umuramyi Isi ikeneye. Yagize ati: “Bryan Lead afite umuziki w’ubuhanuzi n’umwimerere isi ikeneye. Umuziki we urimo ubusabane n’Umwuka Wera, kandi 'Asante' ni imwe mu ndirimbo za Gospel zigaragaza ubwiza n’ubuhanga muri uyu mwaka w’umuziki.”
Bryan Lead (Bryan Dadou Niyigena), washinze Spirit of Worship Center na Leadwave Ltd, ni umuhanzi w'icyerekezo gihamye mu muziki wa gikirisitu, pasitori, umwanditsi w’indirimbo, n’umujyanama. Azwiho umuziki w’ubuhanuzi, imiririmbire y’akataraboneka ya acoustic, n’ubutumwa buhindura imitima, akaba yaragize uruhare runini mu bayobozi b’amasengesho muri Afurika no ku isi yose.
Afashijwe n'umubyeyi we mu buryo bw'umwuka Pasitori William McDowell (Deeper Fellowship Church, USA), Bryan Lead yibanda ku kuzana ububyutse, ubuyobozi bw’ubuhanuzi, no ku buryo bwo gusenga bw’umwimerere.
Binyuze muri Spirit of Worship Center, akora amateraniro ateza imbere gukira kw'imitima, guhura n’Imana, no gutegura abayoboke ku butumwa bw’isi yose, bigatuma aba ijwi ryubahwa kandi ikirangirire mu muziki wa gikirisitu wa none.
Bryan Lead ni umuramyi wo guhanga amaso mu muziki wa Gospel ku rwego mpuzamahanga
Bryan Lead yahuje imbaraga na Gaby Kamanzi bakorana indirimbo "Asante"
Bryan Lead ni Umuyobozi Mukuru akaba n'uwashinze Spirit of Worship Center na Leadwave Ltd
REBA INDIRIMBO NSHYA "ASANTE" YA BRYAN LEAD FT GABY KAMANZI