Bruce Melodie yunamiye Radio; Pallaso na Lydia Jazmine batungurana mu gitaramo cye

Iki gitaramo, cyiswe "Serendipity Sidechic Sunday", cyabaye ku cyumweru tariki 15 Gashyantare 2026, mu kabyiniro ka Guvnor Uganda, kikaba kimwe mu bitaramo byari bitegerejwe cyane muri iki gihugu kubera ubuhanga bw’abaririmbyi n’umubare w’amatike yari yashyizwe ku isoko.

Igitaramo cyayobowe na Abryanz, aho Bruce Melodie yaririmbye acurangiwe n’abagize itsinda rya Symphony Band ndetse n’umucuranzi w’ingoma Yugi Umukaraza. Bruce Melodie yatanze umwanya wo kumenyekanisha indirimbo nshya "Pom Pom" yakoranye na Diamond Platnumz na Joel Brown.

Ku rubyiniro, Bruce Melodie yataramanye na Pallaso, umuhanzi uzwi cyane muri Uganda, aho basangiye indirimbo zirimo nka “Guwe Nze”. Muri iki gitaramo kandi, Bruce Melodie yaririmbye nyinshi mu ndirimbo ze zakunzwe mu myaka 15 ishize ari mu muziki.

Indirimbo yaririmbye zaciye ibintu mu karere k’Afurika y’Iburasirazuba harimo Embeera Zo, yakoranye na Sheebah Karungi.

By'umwihariko, umuhanzikazi Lydia Jazmine yaje ku rubyiniro ashimira Bruce Melodie, avuga ko ari "umuhanzi wenyine wo mu Rwanda akunda kandi yanyakiriye ubwo nari mu rugendo rwo kumenyekanisha Album ye mu Rwanda."

Lydia yanavuze ko we na Bruce Melodie bateganya no gukorana indirimbo mu gihe kiri imbere. Uyu mukobwa yanafashije Bruce Melodie kuririmba indirimbo ‘Neera’ ya Radio na Weasel.

Umwanya wihariye muri iki gitaramo Bruce Melodie yawuhaye Radio, umuhanzi witabye Imana, aho yirimbaga zimwe mu ndirimbo ze zakunzwe mu bihe bitandukanye.

Bruce Melodie yavuze ati "Ndamukunda cyane Radio, nagize amahirwe yo kumumenya." Yanaririmbye kandi indirimbo ‘Neera’ Radio yakoranye na Weasel.

Iki gitaramo kandi kitabiriwe n’abahanzi batandukanye barimo Karole Kasita na Nina Roz, kikagaragaza ko umuziki nyarwanda ukomeje kurenga imbibe.

Pallaso ni umwe mu bahanzi bakomeye muri Uganda, uzwi cyane mu njyana ya Afrobeat na Dancehall. Yamenyekanye mu ndirimbo ze acyesha izina nka Mpa Love, ‘Go Down Low’, ‘Bareke’, aho yagiye agaragaza impano idasanzwe mu kuririmba no gukora indirimbo zihuriza hamwe umuziki gakondo n’uw’ubu.

Yatangiye umuziki akiri muto, akurikirana intambwe za Mukuru we Chameleone, umwe mu bahanzi bakomeye muri Uganda, maze afata umwanya we mu muziki wa Uganda.

Pallaso azwi kandi ku bufatanye bwe n’abandi bahanzi b’akarere, aho yakoranye na Bruce Melodie, Sheebah Karungi, na Davido, bigatuma indirimbo ze zikwira mu karere kose k’Afurika y’Iburasirazuba.

Pallaso ntabwo ari umuhanzi w’indirimbo gusa; azwi no kuba umunyabigwi mu bitaramo, aho abasha gukurura abantu benshi ku rubyiniro, akerekana ko afite impano yo guhuza umuziki n’abafana.

Lydia Jazmine wakoranye na Bruce Melodie ku rubyiniro, ni umuhanzikazi w’umunyamwuga ukomoka muri Uganda, uzwi cyane ku ndirimbo z’urukundo zizamura umunezero mu bafana.

Yamenyekanye mu ndirimbo nka ‘Massuka’, ‘Hit&Run’, ‘You and Me’, aho agaragaza ijwi ryihariye ryorohereza abakunzi b’umuziki kumwumva no kumwiyumvamo.

Lydia Jazmine si umuhanzi w’indirimbo gusa; ni n’umwe mu bagize uruhare mu bufatanye bw’abahanzi bo mu karere.

Mu gitaramo cya Bruce Melodie i Kampala, Lydia Jazmine yageze ku rubyiniro atungurana, ashimira Bruce Melodie ku bufatanye bwe mu muziki no ku kumwakira ubwo yageraga mu Rwanda.

Uyu muhanzikazi azwi kandi ku buryo ashyikirana n’abafana be, akagaragaza ibyishimo no gukundwa n’abantu benshi ku rwego rw’akarere k’Afurika y’Iburasirazuba.

View this post on Instagram

A post shared by janvier iyamuremye (@janvier.250)

Bruce Melodie yatumye i Kampala haba ijoro ry’umuziki ukomeye mu gitaramo cye ‘Serendipity Sidechic Sunday’, aho yataramanye na Pallaso, Lydia Jazmine n’abandi bahanzi bakomeye bo mu karere