Bruce Melodie yabaye umuhanzi wa gatatu wujuje ‘Subscribers’ Miliyoni 1 kuri YouTube

Uyu muhanzi umaze imyaka igera kuri 15 ari mu bari ku isonga mu muziki w’u Rwanda, yageze kuri iyi ntera nyuma y’urugendo rurerure rwaranzwe n’akazi kenshi, gukora indirimbo zikunzwe cyane, no kubaka umubano ukomeye n’abakunzi be haba mu Rwanda no hanze yarwo.

Nubwo ari intambwe ikomeye kuri we, Bruce Melodie abaye umuhanzi wa Gatatu nyarwanda uririmba ku giti cye ugeze kuri uru rwego, asanga abandi bamubanjirije bagaragaje imbaraga mu gukoresha YouTube mu buryo buhamye.

Abo barimo Ngabo Medard Jorbert wamenye na Meddy na Israel Mbonyi, bombi bakaba bakora umuziki wa Gospel. Ni mu gihe abandi baririmbyi bageze kuri uru rwego ari Ambassadors of Christ Choir na Papi Clever & Dorcas.

Kwinjira muri uru rutonde bisobanuye byinshi ku rugendo rwa Bruce Melodie, cyane ko uru rubuga rwa YouTube ruri mu bipimo bikomeye byerekana uko umuhanzi akundwa ku rwego mpuzamahanga.

Mu myaka ishize, Bruce Melodie yakoze indirimbo nyinshi zakunzwe zirimo izamufashije kwagura imbibi z’umuziki we. Yakoranye n’abahanzi mpuzamahanga anakora ibitaramo bitandukanye byamufashije kongera igikundiro.

Ikindi cyamufashije kugera kuri uru rwego ni uburyo yitaye ku mashusho y’indirimbo (music videos), kuko hafi buri ndirimbo asohoye iba ifite amashusho ari ku rwego rwo hejuru, bikamufasha gukurura abamukurikira bashya buri gihe.

Byongeye kandi, imikoranire n’abahanzi bo hanze, cyane cyane abo muri Afurika y’Iburasirazuba n’iy’Iburengerazuba, byamufashije kwagura isoko rye no kwinjira mu matwi y’abatari basanzwe bamuzi.

Kugera kuri miliyoni imwe ya ‘subscribers’ kuri YouTube si intambwe ku muhanzi ku giti cye gusa, ahubwo ni n’ikimenyetso cy’uko umuziki nyarwanda uri kugenda waguka ku rwego mpuzamahanga.

Iyo abahanzi benshi batangiye kugera kuri uru rwego, bituma n’abandi babigiraho, bigatuma habaho guhangana ku rwego rwo hejuru, ndetse n’ishoramari mu muziki rikiyongera.

Ku ruhande rw’abakunzi b’umuziki, ni inkuru nziza kuko bituma babona ibihangano byinshi biri ku rwego mpuzamahanga, kandi bikazamura isura y’u Rwanda mu ruhando rw’imyidagaduro.

Nyuma yo kugera kuri iyi ntera, amaso y’abakunzi ba Bruce Melodie ari ku mishinga mishya ateganya, yaba indirimbo nshya, imikoranire n’abahanzi bakomeye, cyangwa ibitaramo mpuzamahanga.

Hari kandi abasesenguzi bavuga ko iyi ari imwe mu ntambwe zishobora kumufasha kwinjira mu marushanwa akomeye ku rwego mpuzamahanga, cyane cyane mu bihembo bishingira ku mibare y’abamukurikira n’abareba ibikorwa bye kuri murandasi.

Mu gihe urugendo rugikomeje, biragaragara ko Bruce Melodie atari guhagarara aha, ahubwo ari gukomeza gushyira imbaraga mu bikorwa bye kugira ngo arusheho kwagura izina rye no kuzamura ibendera ry’u Rwanda ku ruhando mpuzamahanga. 

Bruce Melodie yinjiye mu mateka y’abahanzi Nyarwanda bageze kuri miliyoni 1 z’abamukurikira kuri YouTube, akomeza kwerekana ko umuziki we urenga imbibi

Nyuma y’imyaka y’imirimo idacogora, Bruce Melodie yujuje miliyoni 1 kuri YouTube, ashimangira ubwamamare bwe mu muziki Nyarwanda no hanze y’u Rwanda 

Bruce Melodie yanditse amateka mashya kuri YouTube,  intambwe ikomeye mu rugendo rwe rw’umuziki rukomeje gutera imbere