Ibi bitaramo byitezwe n’abatari
bake kuko ari ubwa mbere aba bahanzi bombi bazenguruka Intara z’u Rwanda bakora
ibitaramo bihuriweho. Bruce Melodie azaba yizihiza imyaka 16 amaze mu muziki,
mu gihe The Ben azaba yizihiza imyaka 19 amaze asusurutsa abakunzi b’umuziki
nyarwanda.
Mu rwego rwo gutegura ibi bitaramo
ku rwego rwo hejuru, hateguwe urubyiniro runini rufite metero 40 z’ubutambike,
ibintu abategura bavuga ko ari kimwe mu bizatanga ubunararibonye budasanzwe ku
bazitabira ibi bitaramo.
Kuri uyu wa Gatanu tariki 5 Kamena
2026, aba bahanzi baragirana ikiganiro n’itangazamakuru kuri Camp Kigali,
banasusurutsa ababa bahari mu rwego rwo gutangiza ku mugaragaro gahunda ya “Summer
Country Tour” izatangirira i Musanze tariki 13 Kamena 2026.
Nyuma y’i Musanze, aba bahanzi
bazakomereza i Nyagatare tariki 20 Kamena 2026, i Bugesera tariki 27 Kamena
2026, mbere yo gusoza uru rugendo rw’ibitaramo i Rubavu tariki 4 Nyakanga 2026.
Amani Africa ushinzwe ibikorwa byo
gutegura ibi bitaramo (Events Manager), yabwiye InyaRwanda ko urubyiniro
rwateguwe ruzaba rufite metero 40 z’ubutambike, ndetse rukaba ruri munini zimaze
kubakwa mu bitaramo byo mu Rwanda.
Yagize ati: “Iyi ‘stage’ ifite
metero 40 z’ubutambike. Hari kandi n’ahazajya abacuranzi hafite metero 14 kuri
metero 16. Ntekereza ko ari bwo bwa mbere duteguye ‘stage’ ifite ubunini nk’ubu
muri ibi bitaramo.”
Yakomeje avuga ko icyo bifuza atari
ugutanga imyidagaduro gusa, ahubwo ko banifuza kuzamura urwego rw’imitegurire
y’ibitaramo mu Rwanda.
Ati: “Gutumira itangazamakuru no
kubereka ibyo twateguye ni uburyo bwo guha abantu ibintu byiza, ariko kandi
biri mu murongo wo kuzamura urwego rw’uburyo stage zubakwamo n’uburyo ibitaramo
bitegurwa.”
Amani Africa yavuze ko bahisemo
gukorana na ‘Gorilla Events’ kubera ubunararibonye n’icyizere bamaze kugirana
muri gahunda zitandukanye z’imyidagaduro.
Ati: “Twahisemo Gorilla Events kuko
tumaranye igihe kinini dukorana. Ibikoresho biri hano ni byinshi, kandi hari
n’ibindi byinshi bitaragera hano ariko bizifashishwa muri ibi bitaramo.”
Urubyiniro ruzifashishwa muri
Summer Country Tour ruzaba rugizwe n’igice kinini kizajya gitaramirwaho na
Bruce Melodie na The Ben, ibice byihariye by’abacuranzi (Live Band),
ahazashyirwa ibikoresho by’amajwi n’urumuri, ndetse na za ‘screens’ nini
zizajya zifasha abafana gukurikirana neza ibiri kubera ku rubyiniro no
kwamamaza abafatanyabikorwa.
Mu rwego rwo kurushaho guha abafana
amahitamo ajyanye n’ibyiciro byabo, abategura ibi bitaramo batangaje ko
hongewemo amatike mashya arimo itike ya VVIP igura 100,000 Frw ku muntu umwe,
ndetse n’itike ya 500,000 Frw igenewe abantu batanu bazicara ku meza amwe
(Table).
Abategura Summer Country Tour
bavuga ko intego ari ugutanga ibitaramo by’umwihariko, bifite urwego
mpuzamahanga, aho abafana ba Bruce Melodie na The Ben bazabona umwanya wo
kwishimana n’abahanzi babo mu buryo butari busanzwe bumenyerewe mu bitaramo byo
mu Ntara.
Niba ibintu bizagenda nk’uko byateguwe, Summer Country Tour ishobora kuba imwe muri gahunda z’ibitaramo zizibukwa cyane muri uyu mwaka wa 2026, cyane cyane kubera ubufatanye bwa Bruce Melodie na The Ben, ndetse n’urubyiniro rwihariye rwa metero 40 bazataramiriraho abakunzi babo hirya no hino mu gihugu.
Bruce Melodie na The Ben bazataramira ku rubyiniro rwa metero 40, mu rwego rwo kuzamura ubunararibonye bw’abazitabira Summer Country Tour
Urubyiniro runini rwubatswe na Gorilla Events rugiye kwakira Bruce Melodie na The Ben mu bitaramo bine bizazenguruka Intara z’u Rwanda
Abategura Summer Country Tour batangaje ko mu gutegura ibi bitaramo bashyizeho ibice binyuranye, harimo n'igice cy'abitabiriye baguze amatike mu byiciro binyuranye
Mu rwego rwo gutanga igitaramo cyo ku rwego rwo hejuru, hateguwe igice cyo guparikamo ibinyabiziga by'abitabiriye
Iki ni igice cy'abaguze amatike ya VIP, ni uko kizaba gikoze muri ibi bitaramo bine bizagera mu Ntara
KANDA HANO UBASHE KUREBA IKIGANIROKIGARAGAZA AHO IMYITEGURO IGEZE
VIDEO: Melvin Pro/ InyaRwanda