Bruce Melodie, Diamond na Burna Boy bashyizwe mu indashyikirwa 100 muri Afurika

Uru rutonde ruzwi nka “100 Most Notable Peace Icons Africa Honors” rwagiye hanze kuri uyu wa Kane tariki 5 Kamena 2025. Rushyirwaho hagamijwe guha icyubahiro abantu bagaragaza uruhare rufatika mu guteza imbere amahoro, ubumwe n’iterambere.

Bruce Melodie yisanze ku rutonde rumwe n’abandi banyafurika b’ibirangirire barimo Diamond Platnumz wo muri Tanzania na Burna Boy wo muri Nigeria.

Aba bose bazahabwa ibihembo by’icyubahiro mu birori bizabera i Kigali mu Rwanda kuva ku wa 4 kugeza ku wa 6 Nyakanga 2025, muri Marriott Hotel, guhera saa 9:00 z’amanywa kugeza saa 7:00 z’umugoroba.

Uru rutonde rutangazwa buri mwaka, rushyirwa ahagaragara n’impuguke mu ngeri zitandukanye zikorera muri Afurika no hanze yayo, rukaba rugaragaza abantu bafite uruhare rugaragara mu mpinduka nziza ku muryango nyafurika. Rwibanda ku byiciro bitandukanye birimo ubuhanzi, ubucuruzi, siporo, uburezi, ubuyobozi n’imibereho myiza.

Muri uyu mwaka wa 2025, amazina akomeye agaragara kuri uru rutonde arimo Tems, umuhanzikazi wo muri Nigeria uzwi ku rwego mpuzamahanga; Aliko Dangote, umushoramari ukomeye cyane muri Afurika; Victor Osimhen, rutahizamu w’Ikipe y’Igihugu ya Nigeria na Napoli yo mu Butaliyani;

Bruce Melodie, umuhanzi wamamaye mu Rwanda no mu karere; Diamond Platnumz, icyamamare muri Afurika y’Iburasirazuba; na Burna Boy, umwe mu bahanzi bakomeye barenze imbibi z’Afurika.

Mu bandi bari ku rutonde harimo: Pastor Biodun Fatoyinbo wa Coza Global; Ngozi Okonjo-Iweala, uyobora Ishami ry’Ubucuruzi ku Isi (WTO); Tony Elumelu, umushoramari n’umuterankunga w’urubyiruko; Femi Otedola, umushoramari ukomeye; Mohamed Salah, umukinnyi w’umupira w’amaguru;

Guverineri Mallam Umar Namadi wa Leta ya Jigawa muri Nigeria; Nduka Obaigbena, Aigboje Aig-Imoukhuede wa Banki ya Access; n’abandi benshi barimo abaganga, abashoramari, abayobozi mu nzego za Leta n’abikorera.

Bruce Melodie, umaze kwagura izina rye mu karere no hanze yako. Ndetse ari kwitegura gusohora indirimbo yakoranye na Diamond Platnumz.

Ibi birori bizabera i Kigali, ni ubwa kabiri bizaba bibereye mu Rwanda, bikazahuza abantu baturutse mu bihugu birenga 30 byo muri Afurika. Byitezweho gusiga isura nziza ku gihugu mu bijyanye n’ubukerarugendo, ubucuruzi n’iterambere ry’umuco.

Abategura ibihembo bavuga ko intego y’uru rutonde ari ukwerekana ko Afurika ifite abantu benshi bafite ubushake n’ubushobozi bwo kuba igicumbi cy’amahoro, ubufatanye n’icyerekezo gishya cy’iterambere.

View this post on Instagram

A post shared by 100 Most Notable Peace Icon Africa (@the100mostnotable)

Abarimo Umuyobozi Mukuru wa NBA Africa, Clare Akamanzi, Rwiyemezamirimo Sadate Munyakazi, Bruce Melodie, Lupita Nyong'o, Burna Boy, umunyarwenya Trevor Noah basohotse ku rutonde rw'abantu 100 bazahabwa ishimwe ry'indashyikirwa muri Afurika